Astanada Mádenıet jáne sport mınıstrliginiń uıymdastyrýymen dástúrli respýblıkalyq Patrıottar forýmy ótti. Jıyn barysynda elimizdiń ár óńirinen kelgen túrli salanyń úlgili azamattary «Jyl patrıoty» nomınasııasymen marapattaldy.
Forýmnyń ashylý saltanatynda Mádenıet jáne sport mınıstri Arystanbek Muhamedıuly eń aldymen qatysýshylardy Qazaqstan Respýblıkasynyń Táýelsizdik kúnimen quttyqtap, memlekettik rámizderdiń mańyzyn atap ótti.
«Memlekettik rámizder – elimizdiń eń qadirli, eń qasterli sımvoldary. Aspan tústes Baıraǵymyzdyń, Eltańbamyz ben Ánuranymyzdyń árbir elementinde Elbasynyń, sondaı-aq osy iske atsalysqan árbir azamattyń Otanǵa degen mahabbaty men arman-muraty jatyr. Mádenıet jáne sport mınıstrligi memlekettik rámizderdi nasıhattaýdy úılestiretin negizgi organ bolǵandyqtan, otandastarymyzdyń osy qasıetti sımvoldarǵa degen qurmetin arttyrýǵa arnalǵan jıynnyń mańyzy zor», dedi A.Muhamedıuly.
Budan ári mınıstr Qazaqstan Respýblıkasynyń Memlekettik Eltańbasyndaǵy Qazaqstan jazýynyń latyn grafıkasyna aýystyrylýy týraly áńgimeledi.
«Memleket basshysynyń «Qazaq tili álipbıin kırıllısadan latyn grafıkasyna kóshirý týraly» Jarlyǵynyń aıasynda mınıstrlik bıyl memlekettik Eltańbadaǵy «Qazaqstan» sózin latyn grafıkasynda jazý týraly «Qazaqstan Respýblıkasynyń memlekettik rámizderi týraly» Konstıtýsııalyq zańyna ózgerister engizip, tıisti jumystar júrgizdi. Osyǵan baılanysty elimizdiń ár óńirinde halyqtyń boıynda otanshyldyq rýhty qalyptastyrý, memlekettik rámizderge degen qurmetti nyǵaıtý men keńinen nasıhattaýǵa arnalǵan aqparattyq, tanymdyq is-sharalardy ótkizý asa mańyzdy», dedi ol.
2018 jyldyń 12 qyrkúıeginde Tehnıkalyq retteý jáne metrologııa komıtetiniń tóraǵasy A.Shaqqalıev, memlekettik Eltańbanyń avtory J.Málibekov jáne «Qazaqstan standarttaý jáne sertıfıkattaý ınstıtýty» ókilderi qatysqan jıynda «Qazaqstan Respýblıkasynyń Memlekettik Eltańbasy. Tehnıkalyq jaǵdaılar» zańyna ózgertýler engizý qajettigi aıtylyp, kóp uzamaı Eltańbanyń jańartylǵan úlgisi shyǵaryla bastady. Jandarbek Málibekov Elbasynyń bastamasymen júzege asyp jatqan bul ıgi is qazaq álipbıiniń jańa belesi ekenin atap ótti.
«Eltańbanyń jańartylǵan standarttyq úlgisin jasap berý isimen shuǵyldanyp jatyrmyz. Latyn qarpiniń Eltańbada ornalasýy bizdiń álipbıimizdiń bostandyq alǵany dep bilemin. Onyń Eltańbadaǵy kórinisi búkil qazaq dalasynyń qazirgi kezdegi bostandyǵyn kórsetedi», dedi J.Málibekov. Budan soń jıyn barysynda Parlament Májilisiniń depýtattary, ortalyq memlekettik organdardyń ókilderi, úkimettik emes jáne jastar uıymdarynyń jetekshileri, eńbek ardagerleri men zııaly qaýym ókilderi memlekettik rámizder salasynda atqaryp jatqan qyzmetteri týraly ózara pikir almasty.
Qalqaman Jaqyp,
«Jyl patrıoty» nomınasııasynyń ıegeri, A.Baıtursynov atyndaǵy Qostanaı memlekettik ýnıversıtetiniń professory:
– Osydan bir jarym jyl buryn Elbasynyń «Bolashaqqa baǵdar: rýhanı jańǵyrý» atty eńbegi jaryq kórgen bolatyn. Osy eńbektiń negizinde qoǵamdyq jáne ulttyq sananyń jańarýynda silkinis paıda boldy deýge bolady. Sonyń jalǵasy retinde bıyl jaryq kórgen «Uly dalanyń jeti qyry» maqalasynda Prezıdent qazaq ultynyń tól tarıhy tereńde jatqanyn kórsetip berdi. Osy eńbek ulttyq sanamyzdyń joǵary satyǵa kóterilýine áser etetini belgili. Minekı, 27 jylǵa jýyq táýelsiz el bolyp otyrmyz. El bolý úshin birinshi kezekte onyń rámizderi bolýy kerek. Onsyz ulttyń eldigi men memlekettiligi bolmaıdy. Sondyqtan búgingi patrıottar forýmynda eldiń rámizderine degen qurmet erekshe. Munda jınalǵandardyń ishinde jastar, úkimettik emes uıymdar, etnomádenı ortalyqtardyń jetekshileri bar. Sondaı-aq ártúrli salanyń qyr-syryn meńgergen eńbekqor azamattar kelip otyr. Tipti men sekildi zeınetkerler de kórinip qalady. Bul degenimiz – urpaqtar arasyndaǵy jalǵastyqty úzbeý, urpaqtar sabaqtastyǵyn jalǵaý. Eń bastysy – osyndaı sharalar ósip kele jatqan jastarǵa otansúıgishtikti dáriptep, eli men jerine adal qyzmet etýge, Qazaqstannyń patrıoty bolyp qalyptasýyna úlken áserin tıgizedi.
Elbasy – búginde tek Qazaqstannyń ǵana kóshbasshysy emes, túrki áleminiń, túrkitildes elderdiń kóshbasshysy ekenin óz eńbegimen kórsete bilgen tulǵa. Sonyń kórinisi men aıǵaǵy retinde kelesi jyly bolatyn túrkitildes elderdiń kongresin aıta alamyz. Osy sekildi kezdesýler men basqosýda ózimniń de kóńilim erekshe áserge bólenedi. Jastardyń eline degen súıispenshilik sózderi men isterin kórgende keleshekke degen úlken senim uıalaıdy. Shynyn aıtý kerek, keýdeńdi maqtanysh kerneıdi. Bizdiń jastar jaqsy, bizdiń jastar tamasha. Biraq solardy tárbıelep, úlgi kórsetýde bizdiń de atqarar úlesimiz kóp.
Alena Kım,
«B Tim Enterprises» JShS-nyń dırektory (Aqtaý qalasynan):
– Búgin biz óte qyzyqty forýmǵa qatysyp otyrmyz. Munda ártúrli óńirden kelgen delegattarmen ózara pikir almasyp, zııatkerlik qabiletimizdi arttyra tústik. Sondaı-aq úsh tilge degen qyzyǵýshylyq týraly pikir almasýdy kózdep otyrmyz. Mysaly, men aǵylshyn jáne qazaq tilin úırenip júrmin. Jańashyldyqty da eskerý kerektigin bilemin. О́ıtkeni jaqynda qazaq tili latyn álipbıine tolyq kóshedi. Sondyqtan osyndaı ózgeristen aınalamyzdaǵy dostarymyzdyń da qalys qalmaǵany jón. Al búgingi forýmǵa kelgen jastarmen osynyń tóńireginde sóılese alamyz. Forýmǵa kelgenime óte qýanyshtymyn. Munda jınalǵandardyń jasy bolsyn, úlkeni bolsyn elimizdiń órkendeýine eleýli úles qosyp kele jatqan adamdar. Olar Astana qalasynyń 20 jyldyǵyna tuspa-tus kelip otyrǵan merekelik sharanyń qonaǵy mártebesine ıe bolyp otyr.
Elmıra Myrzaǵalı,
Taraz qalalyq máslıhatynyń depýtaty:
– Jambyl oblysynan 4 delegat kelip otyrmyz. Bul patrıottar forýmy bizdiń jumysymyzǵa jańa serpin beredi dep oılaımyn. Elbasymyzdyń sarabdal saıasatyna sáıkes Taraz qalasynda memlekettik rámizderdi qasterleý jumystary jolǵa qoıylǵan. Memlekettik rámizderdiń mártebesin kóterý jumystary tek memlekettik deńgeıde qalyp qoımaýy kerek. Bul ıgi is ár otbasynan bastalýy kerek dep oılaımyn. Men ana retinde de balalaryma memlekettik Týymyzdy, Eltańbamyzdy, Ánuranymyzdy ulyqtaý kerek ekenin árdaıym aıtyp otyramyn. Patrıottyq tárbıeni bala eń aldymen otbasynan kórý kerek.
Forým sońynda túrli salada qyzmet etip júrgen úlgili 20 azamatqa «Jyl patrıoty» nomınasııasy berilip, baǵaly syılyqtar tabystaldy. Is-shara patrıottyq ánderden turatyn konsertpen aıaqtaldy.
Marjan TILEÝBEK,
Janbolat KENJEǴUL,
«Egemen Qazaqstan»