Temirtaý qalasynyń 11 jasar turǵyny Elızaveta Lelkova «ArcelorMittal» transulttyq kompanııasy uıymdastyrǵan jańa jyldyq ashyq hattar baıqaýynda úshinshi júldege ıe boldy.
Konkýrsqa qatysý úshin bir ǵana Temirtaý qalasynan 92 ashyq hat synǵa tústi. Olardyń arasynda Elızaveta Lelkovanyń týyndysy eń úzdik dep tanylyp, halyqaralyq baıqaýǵa joldama alǵan bolatyn.
Korporatıvtik konkýrsta transulttyq kompanııanyń álemniń 21 elinde ornalasqan kásiporyndary qyzmetkerleriniń balalary baq synasty. Taıaýda baıqaýdyń qorytyndysy shyǵarylyp, Krıvoı Rog qalasynyń (Ýkraına) 13 jasar turǵyny Marııa Slovaktyń jeńimpaz atanǵany belgili boldy. Ekinshi oryndy Bremen qalasynyń (Germanııa) 12 jastaǵy sýretshisi Beatrıs Iаshke ıelense, úshinshi júlde temirtaýlyq Elızaveta Lelkovaǵa buıyrdy. Jeńimpaz ben júldegerler aqshalaı syılyqtarmen marapattalady.
Elızavetanyń ákesi Temirtaýdaǵy metallýrgııalyq kombınattyń koks-hımııa óndirisinde jumys isteıdi.
Qaırat ÁBILDA,
«Egemen Qazaqstan»
Qaraǵandy oblysy