Amerıkanyń ataqty sport jýrnalısi, áıgili kommentator Den Rafael 45 jyldyq tarıhy bar ESPN arnasynda kórsetilgen kásipqoı boksshylar arasyndaǵy eń úzdik jekpe-jekterdiń reıtıngin jarııalady.
Eń keremet ári ymyrasyz básekeler qataryna Qazaqstannyń qos dańqty bylǵary qolǵap sheberleriniń qatysýymen ótken jekpe-jekter de endi. Tarqatyp aıtsaq, 2017 jyldyń 16 qyrkúıegi men 2018 jyldyń 15 qyrkúıeginde orta salmaqtaǵy Gennadıı Golovkın men Saýl Alvarestiń aıqasy bul tizimde 16 orynda tur. Las-Vegasta ótken bul kezdesýlerdiń alǵashqysynda teń esep tirkelse, ekinshisi meksıkalyq boksshynyń paıdasyna sheshildi.
2003 jyldyń 26 sáýirinde AQSh-tyń Konnektıkýt shtatynda qazaqstandyq Vasılıı Jırov pen amerıkalyq Djeıms Tonı arasyndaǵy jekpe-jek joǵarydaǵy reıtıngte 22 orynda tur. Birinshi aýyr salmaq dárejesinde ótken bul básekede jerlesimiz jeńilip qalǵan edi.
Al eń úzdik ondyqtyń qataryna myna jekpe-jekter endi:
Baster Dýglas (AQSh) – Maık Taıson (AQSh). 11.02.1990 jyl, Tokıo. Bul báseke 10 raýndta Dýglastyń aıqyn jeńismen aıaqtaldy.
Marvın-Hagler (AQSh) – Tomas Hırns (AQSh). 15.04.1985 jyl, Las-Vegas. Kezdesýdiń 3 raýndynda Hagler qarsylasyn nokaýtqa jiberdi.
Rıddık Boý (AQSh) – Evander Hollıfıld (AQSh). 1992-1995 jyldar aralyǵynda qos boksshy arasynda úsh jekpe-jek uıymdastyryldy. Onyń ekeýinde Boý basym tússe, bireýin Hollıfıld utty.
Mennı Pakıao (Fılıppın) – Hýan Manýel Markes (Meksıka). 2004-2011 jyldar aralyǵynda aıtýly boksshylar arasynda úsh jekpe-jek ótti. Ekeýi de bir-bir retten jeńiske jetip, taǵy bir kezdesýde teń esep tirkeldi.
Aaron Praıor (AQSh) – Aleksıs Argýelo (Nıkaragýa). 12.11.1982 jyl, Maıamı. 14 raýndta Praıor qarsylasyn esinen tandyrdy.
Erık Morales (Meksıka) – Marko Antonıo Barrera (Meksıka). 2000-2004 jyldar aralyǵynda qos boksshy úsh márte bir-birine qarsy keldi. Eki ret Barrera jeńse, bir ret Moralestiń baǵy jandy.
Mıkkı Ýord (AQSh) – Artýro Gattı (Kanada). 2002-2003 jyldar aralyǵynda olardyń joly úsh márte qıysty. Eki ret Gattı, bir márte Ýord basym tústi.
Shýgar Reı Leonard (AQSh) – Tomas Hırns (AQSh). 16.09.1981 jyl, Las-Vegas. Bul báseke 14 raýndta alǵashqysynyń aıqyn jeńismen aıaqtaldy.
Hýlıo Sezar Chaves (Meksıka) – Meldrık Teılor (AQSh). 17.04.1990 jyl, Las-Vegas. 14 raýndta Chaves tehnıkalyq nokaýtpen jeńiske jetti.
Felıks Trınıdad (Pýerto-Rıko) – Fernando Vargas (AQSh). 02.12.2000 jyl, Las-Vegas. Kezdesýdiń 12 raýndynda Trınıdad qarsylasyn tize búktirdi.
Ǵalym SÚLEIMEN,
«Egemen Qazaqstan»