Keshe «Azamattarǵa arnalǵan úkimet» memlekettik korporasııasy Astanada Qazaqstandaǵy eń alǵashqy «Elektrondy qyzmet ortalyģyn» ashty. Ozyq tehnologııalarmen jasaqtalǵan zamanaýı halyqqa qyzmet kórsetý ortalyǵynda azamattar jasandy ıntellekt ıgiligin kórip, sıfrly saýattylyqtaryn kóterip, qyzmetterdi óz betinshe ala alady.
Ortalyqtyń ashylýyna Premer-Mınıstrdiń orynbasary Asqar Jumaǵalıev, Ishki ister mınıstriniń orynbasary Erlan Turǵymbaev jáne Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov qatysty. Ortalyqtyń ashylý saltanatynda memlekettik qyzmetterdi bıometrııalyq derekter boıynsha usyný jobasy iske qosyldy. Bul jobaǵa sáıkes endi front-ofıster men elektrondy úkimet portalynda qyzmetterdi alý úshin tólqujat pen elektrondy sıfrly qoltańba qajet emes, azamattardyń saýsaq tańbasy men bet-álpetiniń skan-beınesi bolsa jetkilikti.
Ázirshe bıometrııalyq derekterdi Astana qalasynda jańadan ashylǵan «Elektrondy qyzmet ortalyǵynda» jáne Almaty qalasynyń Bostandyq aýdandyq HQO-da tapsyrýǵa bolady. Ortalyqta operatorlardyń qyzmetin jasandy ıntellekt – vırtýaldy keńesshiler atqarady. Kire-beriste tulǵany anyqtaıtyn ıntellektýaldy beınebaqylaý ornatylǵan. Eger ortalyqqa kelgen azamattyń bazada bıometrııalyq málimetteri bolmasa, oǵan tirkelip, bıo-málimetterin qaldyrýǵa usynys jasalady.
I-sana atty vırtýaldyq keńesshi kelýshilerdi qarsy alyp, qajetti anyqtamalardy qalaı alý kerektigin aıtyp, sektorlarǵa baǵyttaıdy. Osy jerde «M-gov» mobıldi qosymshasynyń múmkindikterimen tanysyp, SIM kartaǵa ESQ jazyp alýǵa bolady. Sondaı-aq júrgizýshi kýáligin alýdy maqsat etken azamattar mamandandyrylǵan HQO-daǵy avtodrom nusqasyna sáıkes jasaqtalǵan aımaqta «digital drive» jabdyǵynyń kómegimen aldyn ala baıqaý synaǵynan ótip, avtokólik júrgizýge mashyqtana alady.
Álı BITО́RE,
«Egemen Qazaqstan»