Almatyda qazaqtyń aıaýly aqyn qyzy Memlekettik syılyqtyń laýreaty Farıza Ońǵarsynovaǵa arnalǵan eskertkish taqta ornatyldy. Aqynnyń jarqyn beınesin kóz aldymyzǵa ákeletin mármár taqta Shevshenko men Zenkov kósheleriniń qıylysyndaǵy tirshiliginde ózi turǵan úıiniń qabyrǵasynan oryn alǵan.
Farıza aqyn «О́leń seni aıalap ótem» deıtin jyr álemindegi áıgili konsepsııasyn Almatyda júrip órnektedi. Sondyqtan da órshil aqyndy Almatymen baılanystyratyn dúnıe kóp-aq. Qala ákimdiginiń tikeleı qoldaýymen qoıylǵan osynaý memorıaldy taqtany – búgingi urpaqtyń aǵa býynǵa kórsetken qurmeti dep túsingen jón. Kózi tirisinde-aq halqynyń mahabbatyna bólenip, poezııa padıshasy atanǵan aıaýly aqynnyń sezimge toly sáýleli jyrlary oıly oqyrmanyn jyr besiginde terbetip keledi. Muny aq qar kók muzǵa qaramaı eskertkish taqtanyń ashylý saltanatyna kelgen qaraqurym halyqtyń ystyq yqylasynan-aq ańǵardyq. Qala ákiminiń orynbasary Arman Qyryqbaev ashyp bergen saltanatty rásimde aqynnyń otty jyrlary oqylyp, qalamdas inileriniń jyly estelikteri aıtyldy.
– Besigin Atyraýdyń aq tolqyndary terbegen Farıza Ońǵarsynova Almatyǵa kelip óziniń ónermen, óleńmen tabysqan, halyqtyń ǵumyrbaıanyna kirgen jańa ómirin bastady. Almaty ańyzdardy jaratqan Alashtyń arǵy-bergi tarıhyndaǵy ulylarynyń tusaýyn kesken qala. Ońǵarsynovanyń atyn ańyzǵa aınaldyrǵan dastandary, ardaqty týyndylarynyń barlyǵy derlik arý Almatyda kindigin kesti. Bul qala onyń búkil jastyq-shaǵyna, abyroıyn asqaqtatqan syrly sátterge kýá. Bir kezderi bárimiz úshin asaý jyrdyń altyn tórindeı kóringen, aqynǵa saıa bolǵan bul úıdiń orny bólek. Farıza, óleń qyzdar poezııasy nemese erler poezııasy dep bólinbeıtinin, munda tek uly daryndardyń dańǵyly bolatynyn dáleldep ketken jan. Urpaqqa mura bolatyn bul ıgi isti búkil qazaq jyryna jasalǵan qurmet dep esepteımin, – deıdi Memleket jáne qoǵam qaıratkeri, aqyn Nurlan Orazalın.
Arman OKTIаBR,
«Egemen Qazaqstan»
ALMATY