Kerneıdegi muń (áńgime)

Ony oınap otyrǵan qart mý­zykanttyń dýdyraǵan ap­paq saqal-shashy quddy bir taý­dan qulaǵan qar kósh­kini­niń sýretin ákeledi kóz al­dy­ńyzǵa. Al qarttyń qasynda sol «kóshkinnen» túk te qaı­myqpaı, basyna aq bókebaı sháli tartqan shúıkedeı ǵana kem­piri otyr. Onyń ústindegi sur paltosy kezinde jurt qy­zyǵatyndaı-aq sándi kıim bolǵanǵa uqsaıdy. Biraq qazir óńi túsip, jaǵa-jeńiniń ushy qyrqylyp, eskirip qalǵany kórinip tur.

Ekeýiniń aldynda aýzy ashyq eski qobdısha jatyr. Oǵan anda-sanda syldyr etip tıyn-teben túsedi. Bul tyń­daýshylardyń olarǵa degen rızashylyǵy ma, aıaýshy­lyǵy ma, túsiný qıyn...

Erli-zaıypty qarttardyń búgin Arbatqa amalsyzdan shyq­­qany, ıá bolmasa, ekeýi birdeı úıde qur qarap otyr­ǵansha, kósheden az da bolsa tabys tabýǵa bel býǵany − ol da bizge beımálim.

Saqal-shashy ap­paq mýzykant áýelde ba­tystyq klassıka­dan úzip-úzip biraz áýen oryndady. Tyń­daýshylarǵa Al­matynyń Arbaty bir sátke Ve­nany eles­tetip, odan soń Pa­rıjdi, Máskeýdi emis-emis eske salǵandaı boldy. Ashyq jatqan qobdıshaǵa áre­dik-áredik syńǵyrlap usaq teń­geler túsip jatty.

Kenet qart barshamyzǵa tanys, janymyzǵa jaqyn, kóńilimizge ystyq «Qazaq val­sin» quı­qyl­jyta jó­neldi.

Maı týsa, gúlder sheshek atsa jazda...

Tyńdaǵan jurttyń qaba­­ǵy jazylyp, júzi jady­rap, jel­toqsan aıynda aıaq as­ty­nan kún jy­lynyp, aına­la­da­­ǵy aǵashtar japyraq jaıa bas­taǵandaı tań-tamasha kúıge bólendi.

Arbattyń boıymen aıańdap, qy­dyrystap júrgen kóp aıaq­tar kidirip, áýen tógilgen jaqqa qaraı buryldy. Eski qob­­dıshaǵa endi syńǵyrlaǵan usaq teńgelermen qosyla shy­tyr­laǵan jańa banknottar da túse bas­tady.

Úrmeli aspaptyń kerneıi­nen ushyp shyqqan qazaq mý­zykasynyń klassıkasy bıik aspanǵa qaraı samǵap bara jatqandaı bir qyzyq kórinis paıda boldy.

Áıtkenmen, osynaý kó­ńildi áýen­niń ózeginde de muń bar edi. Biraq ol muńnyń úr­meli aspaptyń ker­neıinen shy­ǵyp jatqany, ne bolmasa, qart mýzykanttyń kóńilinen tógilip jatqany barshamyzǵa jum­baq kúıinde qala berdi...

Nurǵalı ORAZ,

«Egemen Qazaqstan»