Elbasynyń ótken jyly jarııalanǵan bes áleýmettik bastamasynda halyqtyń naǵyz kókeıkesti máseleleri qozǵalǵany belgili. Osy bastama boıynsha Aqmola oblysynda da atqarylǵan jáne jańa jylda atqarylýǵa tıisti biraz ıgi ister bar. Sonyń ishinde Memleket basshysynyń bastamasynda birinshi bastama bolyp belgilengen «Árbir otbasyna baspana alýdyń jańa múmkindikterin berý» baǵyty boıynsha ońdy sharýalardy aldymen aýyzǵa alýǵa bolady.
Bastamada alǵa qoıylǵan mindetterdi iske asyrý turǵysynda búgingi kúnge deıin eki júzge jýyq adamǵa páter satyp alýǵa nesıe berildi. Bankterden osy maqsatqa bólingen qarjy kólemi bir jarym mıllıard teńgeden asyp túsedi. «7-20-25» memlekettik baǵdarlamasyn oryndaý jóninde Aqmola oblysy qazir respýblıkamyzdyń ózge aımaqtary arasynda alǵashqy bestikte tur.
Búginge deıin ekinshi deńgeıli bankterge kelip túsken 230-ǵa tarta ótinishtiń oryndalý deńgeıi turǵysynan alyp qarasaq ta, oblys qol jetip otyrǵan kórsetkishter quptarlyq. Shildeniń basynda qolǵa alynǵan «7-20-25» memlekettik baǵdarlamasy barǵan saıyn baspanasy joq aqmolalyqtardy qyzyqtyra túsýde. Bul bastama eresek turǵyndar, sonymen birge, osy áleýmettik muqtajdyqty basynan keship otyrǵan jastar arasynda da birdeı qoldaý tapqan. Bul sátti bastalǵan is jańa 2019 jylda da óristeı túsip, Elbasynyń bes áleýmettik bastamasynyń osy baǵyty boıynsha baspanaly bolatyndar sany arta túsetindigi aıqyn.
Árıne, osy bir qolaıly múmkindikti paıdalanǵan nesıe alýshylar qatary kóp bolýy úshin oblysta úı salý qarqyny da jylma-jyl arta túsýi qajet. Bul oraıda, ótken jyly turǵyn úı qurylysyn júrgizýde oblys úshin óte jemisti boldy. 11 kóp qabatty turǵyn úı salynyp, taǵy 12-siniń irgetasy qalandy. Buǵan qosa, jeke qurylys kompanııalary da myńǵa tarta páterdi paıdalanýǵa berdi. Osynyń bári «7-20-25» memlekettik baǵdarlamasynyń oryndalýyna da ıgi yqpal etpekshi.
Baıqal BAIÁDIL,
«Egemen Qazaqstan»
Aqmola oblysy