Taǵdyrdyń jazýymen aramyz alystap ketkenimen, túrki halyqtarynyń arasynda qazaqqa tili, dini, dili jaǵynan eń jaqyny – noǵaı jurty. Altyn Ordanyń, Noǵaı handyǵynyń alǵashqy astanasy bolǵan Saraıshyqtyń Atyraý oblysynyń aýmaǵynda ornalasqany da baǵzy týystyǵymyzdy bederleıdi.
Alystaǵy aǵaıynmen qaýyshyp, arqa-jarqa bolǵan taǵylymy men tálimi erek shara Atyraýda ótti, Jaıyq jaǵasyna noǵaı halqynyń belgili óner sheberleri, aqyndar men sýretshileri arnaıy keldi.
Atyraý oblysyndaǵy noǵaı halqynyń mádenı kúnderi aıasynda ótken sharalar legi «Kambak» fılminiń kórsetilimimen bastaldy. Reseı Federasııasynyń Qarashaı-Sherkesh Respýblıkasyn, Stavropol ólkesin, Daǵystan Respýblıkasy jáne Astrahan oblysyn mekendeıtin noǵaılardyń qazirgi ómir salty men mádenıeti týraly túsirilgen fılm áserli shyqqan. Fılmniń rejısseri Islam Satyrov noǵaılardyń qazirgi tirshiligin kórsetý arqyly ulttyq qundylyqtardy nasıhattaýdy maqsat etkenin aıtady.
Noǵaıdyń belgili sýretshileri Álibek Qoılaqaev pen Iаkýb Orazaqaevtardyń týyndylary qoıylǵan kórmeni atyraýlyqtar qyzyǵa tamashalady. Noǵaı jáne Qazaqstan ǵalymdary men qalamgerleri dóńgelek ústel basyna jınalyp, mádenıetter arasyndaǵy baılanys jaıynda áńgime órbitti. Eki kúnge sozylǵan shara aıasynda qonaqtar Saraıshyq qalashyǵynyń ornyna baryp, mýzeılerdi aralady. Al mádenıet kúniniń jabylý saltanatynda noǵaı-qazaq ónerpazdary bir sahnada óner kórsetti.
– Edil-Jaıyqty tel emgen, qazaqpen atalas jurt noǵaılardyń búgingi tańdaǵy eń kórnekti óner ókilderiniń Atyraýǵa kelýi mádenıetter arasyndaǵy baılanystyń tamyry tereńde ekenin aıǵaqtaıdy. Memleket basshysy «Bolashaqqa baǵdar: rýhanı jańǵyrý», «Uly dalanyń jeti qyry» maqalalarynda Uly dalanyń jahandyq tarıhtaǵy ornyna tyń kózqaraspen qaraý kerektigin atap kórsetip, mindetter júktedi. Búgingi sharany da osy baǵdarlamalardy iske asyrýdyń bir kórinisi retinde baǵalaýǵa bolady dep esepteımin, – dedi oblys ákimi Nurlan Noǵaev. Al noǵaıdyń tanymal ánshisi Arslanbek Sultanbekov: «Atyraýǵa ár kelgen saıyn rýhtanyp qaıtamyn. Babalarymyz basqan topyraqtyń kıesi men qudireti bólek», – deıdi.
Baýyrlastardyń bul basqosýy áli uzaq ýaqyt aıta júretindeı aıryqsha áserge bóledi.
Baqytgúl BABASh,
«Egemen Qazaqstan»
ATYRAÝ