Jyldam oılap, tez sheshim shyǵara bilý daǵdysyn meńgerýge Rýbık tekshesin qurastyrý oıyny da septigin tıgize alady. Atyraýda ótken Rýbıkti jyldamdyqqa qurýdan aımaqtyq birinshi chempıonattyń da maqsaty osy boldy. Zııatkerlik jarysqa Almaty, Aqtóbe, Semeı, Shymkent qalalarynan daryndy jastar kelip qatysty. Al olardyń ónerlerin baǵalaıtyn táýelsiz sarapshylar Ýkraınadan arnaıy shaqyryldy.
60-tan astam qatysýshy baq synaǵan baıqaýda júldeger ataný da ońaı emes, biraq Atyraýdaǵy Nazarbaev zııatkerlik mektebine jınalǵan jastardyń jeńiske degen jigerleri aıryqsha kórindi. WCA qaýymdastyǵynyń Ýkraınadaǵy ókili Stepan Djýrılo: «Bul meniń Qazaqstanǵa alǵash ret kelýim. Rýbıkti qurastyrý qarqyndy damyp keledi eken, deıdi.
- Osydan bes - on jyl buryn federasııa bólimsheleri tek Astana men Almaty qalalarynda bolǵan. Al qazir eldiń barlyq aımaqtarynda KSF ókilderi jumys isteıdi. Bul memlekettiń jastarǵa, olardyń bolashaǵyna jasap otyrǵan qamqorlyǵy dep esepteımin. Qazaqstanda myqty spıdkýberler kóbeıip kele jatqanyn baıqadym. Al Atyraýdaǵy chempıonatqa qatysýshylardyń basym bóligi mektep oqýshylary boldy. Balalar úshin bul alǵashqy tájirıbe, olardyń bos ýaqyttaryn oı-óristi damytatyn osyndaı isterge arnaıtyndary qýantty.
Eki kúnge sozylǵan saıysta 2h2, 3h3, «megamıks», «pıramıda» sanattary boıynsha Ázız Oljaǵalı, Samalbek Kelimov, Ámirhan Islamovtar jeńis tuǵyrynan kórindi. Ázız kúrdelengen Rýbık tekshesin 12 sekýndta qurastyrdy. Sarapshylardy atyraýlyq Dosymjan Jumabıdenovtiń kózin jumyp otyryp, túrli tústi teksheni áp-sátte jınap bergen óneri tánti etti. Al eń jas qatysýshy Dıas Qaraǵuldyń jasy segizde. Kishkene kúninen beri spıdkýbıngke degen qyzyǵýshylyǵy joǵary bolǵan Dıas ta basqa qatysýshylardan qalysqan joq.
Sharanyń bastamashysy - «KSF» qoǵamdyq birlestiginiń tóraǵasy Arman Máshimov qazir álemde spıdkýbıng júırik oılaý men shapshań sheshim qabyldaý daǵdylaryn qalyptastyratyn shahmat, robottehnıkamen qatar oqytylatyn qosymsha bilim berýdiń bir túrine aınalǵanyn aıtady.
«Spıdkýbıngti mektepterge engizý úshin QR Bilim jáne ǵylym mınıstrligine usynys jasadyq. Aldaǵy ýaqytta bul usynysymyz qoldaý tapsa, myńdaǵan qazaqstandyq balalar úshin rýbıkti jyldamdyqqa qurastyrý jáne halyqaralyq chempıonattarǵa qatynasý múmkindigi artady», - deıdi A.Máshimov.
Baqytgúl BABASh,
«Egemen Qazaqstan»
ATYRAÝ