5-10 qańtar aralyǵynda Sochıde Eýrazııalyq Ekonomıkalyq Yntymaqtastyq uıymynyń uıymdastyrýymen «World folk vision» ulttyq mádenıet jáne óner festıvaliniń jartylaı fınaly ótti. Oǵan Qazaqstan, Reseı, Tatarstan, Daǵystan, Malaızııa syndy birneshe eldiń úzdik aspaptyq, vokaldyq jáne horeografııalyq ujymdary qatysty.
Festıvaldiń qazylar alqasy Italııa, Avstrııa, Germanııa jáne Reseıden kelgen óner salasyndaǵy jetekshi mamandardan turdy. «World folk vision» jobasynyń úılestirýshisi Janna Barsegova baıqaýǵa joǵary deńgeıdegi óner ıeleri qatysyp jatqanyn jáne qazylar alqasyna sheshim qabyldaý ońaı bolmaǵanyn aıtady.
Qazaqstandyq «HasSaq» etno-folklorlyq ansambli atalǵan mýzykalyq baıqaýda júldeli 1-orynǵa ıe boldy. Sondaı-aq 2019 jyly naýryz aıynda Saýd Arabııasynda ótetin fınaldyq kezeńge beriletin úsh joldamanyń birin ıelendi. Bul kezeńde «HasSaq» ansambli álemniń 80 eliniń mýzykalyq toptarymen óner kórsetedi.
Aıta keteıik, «World folk vision» - jyl saıyn ótetin álemdegi eń tanymal folklorlyq-mýzykalyq festıval. Baıqaýdyń shırek fınaly ár jyly álemniń túrli qalasynda ótedi. 2019 jylǵy fınaldyq báseke Saýd Arabııasynyń astanasy Er-Rııad qalasynda uıymdastyrylady.