Memleket basshysy grek-rım kúresiniń áıgili jattyqtyrýshysy Vadım Aleksandrovıch Psarevtiń qaıtys bolýyna baılanysty kóńil aıtty dep habarlaıdy Aqordanyń baspasóz qyzmeti.
«Vadım Aleksandrovıch sport salasynda jarty ǵasyrdan astam ýaqyt qyzmet etken kezinde Valerıı Rezansev, Jaqsylyq Úshkempirov, Anatolıı Nazarenko jáne Vladımır Bakýlın sııaqty Olımpıada oıyndarynyń jeńimpazdary men júldegerleriniń dańqty shoǵyryn tárbıelep shyǵardy. 2014 jyly álemdik grek-rım kúresin damytýǵa eleýli úles qosqany úshin FILA-nyń Dańq zalyna onyń esimi jazyldy», – delingen jedelhatta.
Sońynda Qazaqstan Prezıdenti Nursultan Nazarbaev Vadım Psarevtiń jarqyn beınesi halqymyzdyń jadynda árdaıym saqtalatynyn atap ótti.