Aqtóbe oblysynyń ákimdigi 2018 jyldyń jeltoqsan aıy ishindegi Tuńǵysh Prezıdent, Táýelsizdik kúni merekelerine baılanysty jáne jyl qorytyndysyna oraı qyzmetkerler men jumysshylarǵa syıaqy tóleý jóninde bastama kótergen bolatyn. Bul shaqyrýǵa oblystaǵy úlkendi-kishili kásiporyndar jetekshileri naqty ispen jaýap berdi.
Mereıli sharany tolyq atqarý úshin oblystyq Ekonomıka jáne bıýdjetti josparlaý basqarmasy óńirdegi orta jáne iri kásiporyndardyń qarjylyq jaǵdaıy men syıaqy berý múmkindigine tıisti taldaý júrgizdi. Sonyń nátıjesinde 176 kásiporyndaǵy 40 myńǵa jýyq qyzmetker qomaqty syıaqyǵa qol jetkizdi. Bir qyzmetkerge shaqqanda onyń ortasha mólsheri 85 myń teńgeni qurady. Syıaqynyń jalpy mólsheri 3,1 mıllıard teńgeden asyp tústi.
Osy oraıda óz qyzmetkerlerine syıaqy tóleý isinde múddelilik kórsetken ári dástúrli on úshinshi jalaqyny berýde tabandylyq tanytqandardyń qatarynda «Kazhrom TUQ» AQ», «ESNPS – Aqtóbe munaı-gaz», «KMK Munaı», «QazaqOıl» JShS, «Saǵyz Petroleým», «AmanMunaı», «Hromtaý opereıtıng» sekildi irgeli kásiporyndar bar.
Sondaı-aq osy ýaqyt aralyǵynda turmysy tómen kóp balaly otbasylardyń ul-qyzdary jáne ata-ananyń qamqorlyǵynsyz qalǵan balalar da nazardan tys qalǵan joq. Bul oraıda júrgizilgen qaıyrymdylyq qaǵıdattary 20 myńǵa jýyq jetkinshekti qamtydy. Sonymen birge aıryqsha qamqorlyq pen bilim berýdi qajet etetin 3626 oqýshy «Balalarǵa qýanysh syıla» aksııasyna tartyldy. Soǵan sáıkes olarǵa arnaıy syılyqtar berildi.
Temir QUSAIYN,
«Egemen Qazaqstan»
AQTО́BE