Aqtóbe shekara otrıadynyń áskerı qyzmetshisi, serjant Kenjeǵulov Azamat Ońdasynuly qalta urysyn qolǵa túsirdi. Bul týraly UQK ShQ baspasóz qyzmeti habarlady.
Aqtóbe shekara otrıadynyń áskerı qyzmetshisi, serjant Kenjeǵulov Azamat Ońdasynuly keshe, saǵat 20-lar shamasynda kezekti jattyǵýdan shyǵyp, qoǵamdyq kólikpen úıine qaıtyp kele jatqan bolatyn. Avtobýstyń artqy jaǵynda otyrǵan Azamat kúdikti adamdy baıqap, jasyryn túrde ańdyp otyrǵan.
Shekarashynyń kúdigi dáleldenip, álgi adam kezekti «qurbandyǵynyń» qaltasynan, asqan «sheberlikpen», ámııanyn sýyryp ala bergen kezde onyń qylmys aspabyna aınalǵan qoly aıǵaq zatymen birge qoıan-qoltyq urys tásilderin jaqsy meńgergen Azamattyń «temir qursaýyna» túsip, arqasyna qaraı qaıyryldy. Qylmys ústinde ustalǵan uryny serjant A. Kenjeǵulov ózi shaqyryp úlgergen polısııa narıady kelgenge deıin tyrp etkizbeı tizesimen basyp otyryp, qoldan-qolǵa ótkizip berdi.
Keıin anyqtalǵandaı, ustalǵan adam ishki ister organdary tarapynan izdeýde júrgen eken.