Kóp balaly, jalǵyzbasty jáne áleýmettik jaǵynan az qamtylǵan analardy qoldaýǵa arnalǵan shara birinshi kezekte 200 adamdy qamtıdy, - dep habarlaıdy Atyraý oblysynyń О́ńirlik kommýnıkasııalar qyzmeti.
Atyraýda «Jaıyq» sport kesheninde oblys ákiminiń esep berý kezdesýi ótip jatyr. Nurlan Noǵaev eki myń adamnyń aldynda «Atyraý oblysynyń 2018 jylǵy áleýmettik-ekonomıkalyq damý qortyndylary týraly» baıandama jasap, bıylǵy josparlardy atap ótti.
Nurlan Noǵaevtyń aıtýynsha, qazir aımaqta kóp balaly jumyssyz analardy, jalǵyzbasty, múgedek bala tárbıelep otyrǵan jáne áleýmettik jaǵynan az qamtylǵan analardy qoldaýǵa baǵyttalǵan sharalar jasalǵan. Shara aıasynda analar jańa mamandyq meńgerýdiń qysqa merzimdi kýrstaryna qatysady. Birinshi kezeńde kýrsqa 200 adam qatysady degen jospar bar. Áıelderdiń tańdaýlaryna 10 kásibı baǵyt beriledi, kýrs 15 kúnge deıin sozylady. Oqý aıaqtalǵan soń qatysýshylarǵa sertıfıkat beriledi.
- Kýrstardy Azamattyq ortalyqtyń mamandary daıyndady. Bizdiń maqsatymyz – áıelderdi kásipkerlik negizderine oqytý, sol arqyly óz isterin bastap, maqsattaryn aıqyndap, alǵa qaraı damýlaryna qoldaý kórsetý. Búginde óńirdegi kásipkerlerdiń 47% - áıelder. Bul kórsetkishti áli de arttyrý kerek, - dedi Atyraý oblysynyń ákimi.
Jumyssyz analardy oqytatyn on baǵyttyń ishinde tiginshi, aspaz, shashtaraz, manıkıýr, vızaj, býhgalterııa, emdik massaj, ınternet-saýda daǵdysy, SMM sekildi kýrstar bar. Oqý aptasyna úsh ret júredi, naýryz aıynan bastap top jınalady.
-Kýrs barysynda áıelder jańa mamandyqty ıgerip qana qoımaı, áleýmettik jelilerde is júrgizý, marketıng pen bıznes negizderine onlaın rejımde oqı alady, - dedi Nurlan Noǵaev.
Aıta keteıik, Atyraý oblysynda 1 aqpan 2019 jylǵy málimet boıynsha, 12 249 kóp balaly ana járdemaqy alady, onyń ishinde 5557 «Kúmis alqa», 3594 «Altyn alqa» ıegerleri, 10 jáne odan da kóp bala tárbıelep otyrǵan 983 batyr ana bar. Memleketten járdemaqy alatyn analardyń jalpy sany – 22 383 adam.
Kýrstarǵa oqýǵa jumyssyz kóp balaly analar, jalǵyzbasty analar, múgedek bala tárbıelep otyrǵan jáne áleýmettik osal toptaǵy analar shaqyrylady.
Baqytgúl BABASh,
«Egemen Qazaqstan»
Atyraý