Tártip saqshylarynyń birikken, júıeli jumystarynyń arqasynda balalar aman – esen úılerine oraldy. Bul týraly Qyzylorda oblysy polısııa departamentiniń baspasóz qyzmeti habarlady.
2019 jyldyń 19 aqpanynda saǵat 03.40 shamasynda Qyzylorda qalalyq polısııa basqarmasynyń Jedel basqarý ortalyǵyna qala turǵynynan qyzy 7-synyp oqýshysynyń úıinen ashýlanyp shyǵyp ketip, qaıta oralmaǵany jaıly habarlama túsedi.
Tekserý barysynda anasy qyzyna ydys-aıaqty jýmaǵany úshin urysqany belgili boldy.
Jasósipirimdi izdeý jumystaryna ıývenaldy polısııa, patrýldi polısııa narıadtary jumyldyrylyp, kópqabatty úılerdiń ójireleri men shatyrlary, aýlalary, qurylys júrip jatqan obektiler, mekemelerdiń aýlalary aralanyp, turǵyndardan surastyrý jumystary júrgizildi.
Jedel-izdestirý jumystarynyń nátıjesinde 05:20 shamasynda Tıtov qystaǵynyń turǵynynan túsken habarlamadan soń qyz «Eski» bazar aýmaǵynan tabyldy. Tártip saqshylarymen joǵalǵan jasóspirim polısııaǵa jetkizilip, ata-anasyna aman-esen qolhatpen tapsyryldy.
Aıta keterlik jaıt, sońǵy ýaqyttarda kámeletke tolmaǵandardyń ata-anasymen renjisip, úıden ketip qalý deregi jıi oryn alýda.
Máselen, 14 aqpanda Tasbóget kentinde kámeletke tolmaǵan kolledjdiń 1- kýrs stýdenti sabaqqa ketip, úıine qaıta oralmaǵan.
Tekserý barysynda týysqan apasynyń týǵan kún keshinen kesh qaıtqany úshin anasynyń qyzyna urysqany anyqtaldy. Izdestirý jumystary barysynda kámeletke tolmaǵan qyz synyptasynyń úıinde júrgen jerinen tabyldy.
Sonymen qatar, 18 aqpanda kolledjdiń taǵy bir stýdenti sabaqqa ketkennen qaıta oralmaǵan. Atalǵan habar-osharsyz ketý deregi boıynsha barlyq jeke quram qulaqtandyrylyp, izdestirý jumystary júrgizildi. Kúshter men quraldardy jan-jaqty jumyldyryp izdestirý sharalarynyń nátıjesinde arada 7 saǵat ótkennen soń habar-osharsyz joǵalǵan qyz Sabalaq saıajaıynda tabyldy.
Oblys boıynsha 2019 jyldyń 1 aı 19 kúninde kámeletke tolmaǵandar arasynda habar-osharsyz ketýdiń osyndaı 7 deregi tirkelip, olardyń barlyǵy ata-analaryna aman – esen tapsyrylǵan.
Osyǵan oraı, polısııa qyzmetkerleri balalarǵa degen baqylaýdy jáne jaýapkershilikti kúsheıtip, qaýipsizdigin qamtamasyz etý baǵytyndaǵy sharalardy arttyrý qajettigin qatań eskertedi.