Býrabaı aýdanynda qysqy Prezıdenttik kópsaıystan oblystyq birinshilik ótti. Jarys jalpy bilim beretin mektepter arasynda «Jastar» jáne orta arnaýly oqý oryndary arasyndaǵy «Kezeń» ataýymen uıymdastyryldy.
Bul naýryz aıynyń 1-i men 7-si aralaǵynda ótetin respýblıkalyq jarysqa irikteý týry. Sportshylardyń qarasy da qalyń. Árqaısysy oqý ornynyń úmitin arqalap kelgender. О́ńirdiń 15 jalpy bilim beretin mektepteri men 11 orta arnaýly oqý oryndarynyń sportshy ul-qyzdary qatysqan báseke tartysty ótti. Uıymdastyrýshylardyń aıtýynsha, Prezıdenttik kópsaıys jastardyń sportpen shuǵyldanýyna kóp septigin tıgizedi.
–Bul jastardyń sportpen aınalysyp, salaýatty ómir saltyn ustanýǵa septigin beretin jarys. Sebebi, munda mektep oqýshylarymen birge stýdent jastar qatysyp, óz baqtaryn synaýda. Biz respýblıkalyq olımpıadaǵa daıyndaý ortalyǵymen tyǵyz qarym-qatynasta jumys isteýdemiz,–deıdi oblystyq bilim basqarmasy janyndaǵy dene tárbıesi jáne oqý-ádistemelik ortalyǵynyń dırektory Aman Ermuhanov.
Qysqy spartakıada sporttyń birneshe túrinen ótkizildi. Aldymen, jarysqa qatysýshylar kermege tartylý, gımnastıka, kóz mergendigi jáne keýdeni jerden kóterý boıynsha saıysty. Keıin jasóspirim ul-qyzdar shańǵy jarysy boıynsha baqtaryn synady. Degenmen, báseke joǵary.
Oblys birinshiliginiń qorytyndysy boıynsha jalpy bilim beretin mektepter arasynda alǵashqy oryn Stepnogorsk qalasyna buıyrdy. Al, orta arnaýly oqý oryndarynyń ishinde úzdik shyqqan Shýchınsk joǵary pedagogıkalyq kolledji boldy. Oblys birinshiliginde iriktelip shyqqan komanda endi respýblıkalyq deńgeıde óńir namysyn qorǵaıtyn bolady.
Baıqal BAIÁDIL,
«Egemen Qazaqstan»
Aqmola oblysy