Túrkistan oblysynyń aqparat salasynda aıtýly oqıǵa boldy. Kóne shaharda ornalasqan elimizdiń irgeli oqý oryndarynyń biri Q.A.Iаssaýı atyndaǵy Halyqaralyq qazaq-túrik ýnıversıteti men Qazaqstan Jýrnalıster jdaǵynyń Túrkistan oblystyq fılıalynyń arasynda ózara yntymaqtastyq týraly memorandým túzildi. Osy mańyzdy qujatty júzege asyrýdaǵy alǵashqy qadam – fılıaldyń janynan jas jýrnalıster klýbynyń qurylýy boldy. Qazirdiń ózinde onyń músheligine 42 talantty jas qabyldandy.
Búgingi tańda ýnıversıtette jýrnalıstıka mamandyǵy boıynsha 100-ge jýyq stýdent tálim alýda. Túrki áleminiń rýhanı astanasy sanalatyn Túrkistan shaharyn túletýde aqparattyq salanyń alar orny erekshe ekeni daýsyz. Halyqaralyq ýnıversıtettiń rektory Bolatbek Abdrasılov sapaly kadrlardy daıarlaý isindegi oń ózgeristerdiń oryn alyp jatqanyn aıta kele, osy memorandým aıasynda jemisti jumystardyń atqarylatynyna senim bildirdi. «Túrkistannyń túlep, túrlene túsýinde buqaralyq aqparat quraldary aıryqsha mańyzǵa ıe, sebebi shahardaǵy oń ózgerister jaıly jaǵymdy jańalyqtardy elmen birinshi kezekte jýrnalıster bólisedi.
Sondyqtan stýdentterimiz úshin tájirıbe almasyp, bilikti kadr retinde qalyptasýy úshin barynsha atsalysýymyz qajet.
«Bilim» týraly zańǵa engizilgen ózgeristerge sáıkes, teorııalyq sabaqtardan góri praktıkaǵa basymdyq berip, stýdentterdiń túrli aqparat quraldarynda taǵylymdamadan ótýine jaǵdaı jasalatyn bolady. Osy turǵyda Qazaqstan jýrnalıster odaǵynyń oblystyq fılıalymen arada túzilgen memorandýmǵa artar úmitimiz mol», - dep oı bólisti ýnıversıtettiń rektory B.Abdrasılov.
Qazaqstan Jýrnalıster odaǵy Túrkistan oblystyq fılıalynyń tóraǵasy Ǵalymjan Elshibaıdyń aıtýynsha, ekijaqty kelisimniń aıasynda aldaǵy ýaqytta jastardyń shyǵarmashylyǵyn shyńdaý maqsatynda sheberlik synyptary, trenıngter, forýmdar men basqa da is-sharalar uıymdastyrylady. Stýdentterdiń eldegi eń bedeldi aqparat quraldarynda praktıkadan ótýine, jastar tarapynan usynylǵan medıajobalardy júzege asyrýǵa Jýrnalıster odaǵy tarapynan barynsha qoldaý kórsetilmek. Búgingi tańda oqý ordasyndaǵy jýrnalıstıka salasyn meılinshe damytý baǵytynda birqatar joba júzege asyrylýda.
Aldaǵy ýaqytta ýnıversıtette radıo jáne telestýdııa óz jumysyn bastamaq. Jastar aýdıtorııasyna arnalǵan «Iаssaýı.FM» radıosyn ashý baǵytynda da qadamdar jasalýda.
Sonymen qatar ýnıversıtet pen «Ońtústik» telearnasynyń arasynda da ózara yntymaqtastyq jaıly memorandýmǵa qol qoıyldy. Bul Túrkistan óńirindegi teledıdar salasy úshin qajetti bilikti kadrlardy daıarlaýdaǵy mańyzdy qadam retinde baǵalanýda.
Nurshat TО́KEN,
«Egemen Qazaqstan»
Túrkistan