Elbasy kitaphanasynda Jastar jylyna arnalǵan «Uly dala jastary» atty mádenı-kórmelik is-sharalar toptamasynyń saltanatty ashylýy ótti. Mádenı shara – Qazaqstan beıneleý óneriniń zamanaýı úrdisterimen tanysýǵa múmkindik beretin birden-bir joba.
Jıynǵa belgili otandyq sýretshiler men músinshiler, mýzykanttar, Qazaqstandaǵy shet memleketterdiń elshileri men dıplomatııalyq ókildikterdiń qyzmetkerleri, elordalyq ýnıversıtetterdiń jetekshileri, oqytýshylar men stýdentter qatysty. Elbasy kitaphanasy dırektorynyń birinshi orynbasary Ámirhan Rahymjanov saltanatty jıyndy ashyp, qatysýshylarǵa sáttilik tiledi.
– Elbasy kitaphanasy Jastar jylyna arnalǵan aýqymdy is-sharalar toptamasyn bastaıdy. Solardyń qatarynda «Jastar – el tiregi» keshendi taqyryptyq kórmemizdi, zamanaýı sýretshilerimizdiń, músinshilerimizdiń, sándik-qoldanbaly óner sheberlerimizdiń, ónertanýshylarymyzdyń shyǵarmashylyǵyn nasıhattaýǵa, qoldaýǵa baǵyttalǵan baıqaýymyzdy jarııalaımyz. Jas urpaqtyń tárbıesi – adamzattyń máńgilik taqyryby. Endeshe, búgingi kórmemiz de, aldaǵy ýaqyttaǵy óner týyndylary jaıly is- sharalarymyz da ásirese jastardyń eńbekqorlyǵyna, talap-tilegine, arman-muratyna baılanysty. Olar ata-babalarymyzdan mura bolyp kele jatqan qundylyqtarymyzdy, tarıhı dástúrlerimizdi jańǵyrtyp qana qoımaı, el ekonomıkasy men ǵylymyn damytýǵa da kúsh salý kerek. Olaı bolsa, qurmetti baıqaýǵa qatysýshy jastar! Sizderdi búgin bastaý alǵan baıqaý jumysyna belsene qatysýǵa shaqyramyn, – dedi ol.
Sondaı-aq «Astana qalasynyń sýretshiler odaǵy» qoǵamdyq birlestiginiń tóraǵasy Januzaq Músápir sóz alyp, jobanyń talantty jastardy tanytatyn bereri mol baǵdarlama ekenin aıtty.
– Elbasy kitaphanasy men Astana qalasynyń Sýretshiler odaǵy úlken jobany qolǵa alyp otyr. Bul – bizdiń jastardyń alǵa qoıǵan maqsattaryn, óner salasyndaǵy oılaryn damytýdyń bir tetigi. Bizdiń alǵa qoıǵan maqsatymyz – jastardy ónerge baýlý, olardyń shyǵarmashylyqtaryn halyqqa jetkizip odan ári álemge tanytý. Bolashaqta basqa da aýqymdy sharalardy birlese júzege asyramyz, – deıdi Januzaq Músápir.
«Jastar – el tiregi» atty keshendi taqyryptyq kórmede Qazaqstannyń jastar áleýetin iske asyratyn bilim, ǵylym, qoǵamdyq qyzmet, mádenıet pen sport syndy negizgi salalar qamtyldy.
– Meniń sýret ónerimen aınalysyp kele jatqanyma jıyrma jyldan asty. Byltyr ózimniń jeke kórmemdi ótkizdim. Jastar jylyna oraı uıymdastyrylǵan búgingi kórmege «Tirshilik qamy» degen týyndymdy usyndym. Mundaı kórmeler ózim sııaqty jas sýretshilerge taptyrmas tájirıbe der edim. О́ıtkeni osyndaı mádenı sharalarǵa qatysý arqyly kóp nárseni úırenip, shabytymyzdy sharyqtata túsemiz, – dep oı bólisti jas sýretshi Rústem Berkinbaev.
Kórme barysynda habarlanǵandaı, jas sýretshiler, músinshiler, sándik-qoldanbaly óner sheberleri men ónertanýshylar arasyndaǵy eń úzdik kórkem shyǵarmalar baıqaýy jarııalandy. Maýsym, jeltoqsan aılarynda qorytyndylanatyn baıqaý nátıjesi negizinde úzdik shyǵarmalardyń kórmesi uıymdastyrylyp, baıqaý jumystarynyń katalogy basyp shyǵarylady.
Aıa О́MIRTAI,
«Egemen Qazaqstan»