Qazaqstan halqy Assambleıasynyń Májilistegi depýtattyq tobynyń IV sessııaǵa (VI shaqyrylym) arnalǵan jumys josparyna sáıkes keńeıtilgen otyrys ótti.
Kún tártibinde «Qazirgi qoǵamdaǵy múgedektigi bar balalar jaǵdaıynyń ózekti máseleleri» degen taqyryp qaraldy. Jıynǵa Májilis depýtattary, mınıstrlikterdiń jaýapty qyzmetkerleri jáne qoǵamdyq birlestikterdiń ókilderi qatysty.
Otyrystyń basynda depýtattyq toptyń jetekshisi Saýytbek Abdrahmanov keıingi kúnderde áleýmettik jelilerde jarııalanyp júrgen, memlekettiń ult saıasatynyń túbegeıli máselelerine qatysty postarǵa qatysty óz oıyn bildirdi. Atap aıtqanda, áleýmettik jelilerde áldebireýdiń basqa ult ókilderinen «kek qaıtarýǵa» shaqyrǵan rolıkteri jarııalanyp, kóbeıtile taratylyp keledi. Deni saý deýge aýyz bara qoımaıtyndaı adamnyń ol sózderiniń aqylǵa qonymsyzdyǵyna, ashyqtan ashyq, arandatýshylyq sıpaty bar bul rolıkter jeli qoldanýshylarynyń ashý-yzasyn týǵyzyp otyr. Jalpy, mundaı ustamsyz áńgimeler ultaralyq arazdyqty qozdatýy ábden múmkin. S.Abdrahmanov tıisti organdar bul oqıǵaǵa óz baǵasyn beredi dep senetinin jetkizdi. Májilistegi Qazaqstan halqy Assambleıasynyń depýtattyq toby bul máseleni nazarda ustaıtyn bolady dedi depýtat.
Al otyrystyń kún tártibindegi másele boıynsha Qazaqstan Respýblıkasy Parlamenti Májilisiniń depýtaty Magerram Magerramov jáne basqa sóz sóıleýshiler memlekettiń basty mindetteriniń biri múmkindigi shekteýli adamdardyń áleýmettik yqpaldasýyn, teń quqyqtary men múmkindikteriniń bolýyn qamtamasyz etý bolyp tabylatynyn atap ótti.
Elimizde múmkindikteri shekteýli adamdardy, sonyń ishinde balalardy qorǵaý jóninde zańnamalyq negiz, normatıvtik aktiler bar. Bul mańyzdy máselede memlekettik organdar, jurtshylyq, úkimettik emes uıymdar birlese jumys atqarýda. Múgedektigi bar balalarǵa, sondaı balasy bar otbasylarǵa tıisti kómek kórsetilip jatqanyn jáne bolashaqta járdem etý qajettigi týraly aıtyldy.
Otyrysty Májilis Tóraǵasynyń orynbasary Vladımır Bojko qorytyndylady.
Serik ÁBDIBEK,
«Egemen Qazaqstan»