«Áleýmettik medısınalalyq saqtandyrý qory» KEAQ ınfeksııalyq aýrýlarmen qalaı kúresýge bolatynyn habarlady.
«Áleýmettik medısınalalyq saqtandyrý qory» KEAQ málimetine sáıkes, ınfeksııalyq aýrýlar kóbeıip, emdeý mekemelerine túsýshiler sany artyp keledi. Derekterge súıensek, 2018 jyldyń qorytyndysy boıynsha Astana qalasynda eresekter arasynda 1965 naýqas joǵarǵy tynys joldarynyń jedel qabynýy, 690 – qozdyrǵyshtary belgili jedel tonzıllıt, 81 - qozdyrǵyshtary belgisiz jedel tonzıllıt dıagnozdarymen tirkelgen.
Balalar arasynda 6 819 - qozdyrǵyshtary belgisiz tynys joldarynyń jedel ınfeksııasy, 266 - qozdyrǵyshtary belgili jedel tonzıllıt, 470 - qozdyrǵyshtary belgisiz jedel tonzıllıt, 32 - joǵarǵy tynys joldary ınfeksııasy dıagnozdarymen tirkelgen.
«2019 jyly ınfeksııalyq aýrýlardy emdeý úshin qalalyq ınfeksııalyq aýrýhanaǵa 827,4 mln teńge, balalar ınfeksııalyq aýrýhanasyna 1 545,6 mln teńge bólindi. Bul, jalpy alǵanda, 2,3 mlrd qarjy, ótken jylmen salystyrǵanda 0,3 mlrd somaǵa kóp» dedi ÁMSQ Astana qalasy boıynsha fılıalynyń dırektory Nurlybek Qabdyqaparov.
Infeksııalyq aýrýlardyń tumaý, jel sheshek, qyzylsha, rotovırýsty ınfeksııa, t.b. túrleri óte kóp. Ár ınfeksııalyq aýrýdyń óz vırýstary, bakterııalary, t.s.s. qozdyrǵyshtary bar. Infeksııalyq aýrýlardyń eń qaýiptisi, tolyq emdelmese aǵzanyń basqa da aýrýlaryn qozdyryp jiberedi. Sondyqtan ınfeksııalyq aýrýlardan saqtaný joldaryn bilgen jón.
Qazirgi sátte maýsymdyq ahýalǵa baılanysty sýyq tııý, tumaý, baspa, tynys joldary syrqattary jıi kezdesedi. Belgileri jaǵynan uqsaıtyndyqtan bolar, kópshilik sýyq tııý men tumaýdy shatastyryp jatady. Sýyq tıgende adam aǵzasy ony ózi de jeńe alady. Keıde eleýli asqynýlar bolýy múmkin, árıne. Degenmen, ımmýndyq júıeni nyǵaıtý jáne sýyq tııý men tumaýdyń alǵashqy belgileri bilinisimen qoldy jýý, tynys alý joldaryn (muryn, tamaq) shaıý, ıaǵnı gıgıenany, tazalyq sharalaryn saqtaı otyryp, saýyqtyrý sharasyn júrgizip, kez kelgen asqynýlardy boldyrmaýǵa bolady.