Shalǵaı aýdandar men turǵyn úı alaptarynda oqýshylarǵa qosymsha bilim beretin komıýnıtı-ortalyqtar ashylýda, dep habarlaıdy Astana qalasy ákimdiginiń resmı saıty.
Maqsaty – úıirmeler men seksııalardy barlyq balalar úshin qoljetimdi etý, Qazir qalada tórt komıýnıtı-ortalyq bar. Onyń biri Balalar úıinde, al qalǵany jalpy bilim berý mektepterinde qurylǵan.
«Shuǵila» komıýnıtı-ortalyǵy – jańa Oqýshylar saraıynyń fılıaly. Ol №68 jáne №80 mektepterde jumys isteıdi. Mahambet О́temisuly atyndaǵy Oqýshylar saraıy da óz fılıaldaryn ashyp jatyr. Sondaı ortalyqtyń biri №20 mektepte ashylsa, ekinshisi №86 jańa mektepte qurylmaq.
Munda robot tehnıkasy jáne 3D-modeldeý, beıneleý óneri, sándik-qoldanbaly óner, teatr jáne vokal úıirmeleri jumys isteıdi. Sondaı-aq, sporttyq voleıbol, basketbol, shaǵyn-fýtbol, dzıýdo, shahmat, toǵyzqumalaq seksııalary bar. Sabaqtardy Oqýshylar saraıynyń muǵalimderi júrgizedi. Úıirmeler tegin. Ákimdik komıýnıtı-ortalyqtar jelisin keńeıtýdi josparlaýda.
«Mundaı ortalyqtardyń bireýi ǵana 800 balany qamtıdy. Úıirmeler men seksııalardyń bári tegin. Bul – halyqtyń osal toptary qataryndaǵy azamattardy, kópbalaly otbasylardy qoldaýdyń naqty qadamdarynyń biri. Ásirese, óz balasyn qaraýsyz qaldyrýǵa qorqyp, budan buryn jumysqa shyǵa almaǵan ata-analar úshin óte yńǵaıly», – dedi qala ákimi Baqyt Sultanov halyqqa esep berý kezinde.