Konstıtýsııalyq Keńestiń tóraǵasy Qaırat Mámı Eýropa Keńesiniń Quqyq arqyly demokratııa úshin Eýropalyq Komıssııanyń 15-16 naýryzda Venesııada (Italııa) ótip jatqan 118-shi plenarlyq sessııasynyń jumysyna qatysty.
Sessııa jumysyna Eýropa Keńesiniń, Eýropa Odaǵynyń, EQYU-nyń, Venesııalyq komıssııanyń basshylyǵy, shetel parlamentteriniń, sottar men konstıtýsııalyq ádilet organdarynyń basshylary men músheleri qatysyp jatyr. Sessııanyń negizgi bóligi jekelegen memleketterdiń zańnamalyq aktileri boıynsha Komıssııanyń qorytyndylaryn qabyldaý máselelerine arnalǵan.
Sessııa sheńberinde Qazaqstan Konstıtýsııalyq Keńesiniń Tóraǵasy halyqaralyq zań qoǵamdastyǵyn 2017 jylǵy konstıtýsııalyq reformanyń negizgi baǵyttaryn iske asyrý úshin qabyldanǵan zańnamalyq jáne ózge de sharalar týraly habardar etti. Venesııalyq komıssııa men birqatar memleketterdiń konstıtýsııalyq sottarynyń basshylarymen ekijaqty jumys kezdesýleri ótti.
Qaırat Mámı Venesııa komıssııasynyń prezıdenti Djannı Býkıkkıomen Qazaqstan men Komıssııanyń quqyq ústemdigi qaǵıdalary salasyndaǵy yntymaqtastyǵyn talqylady. Sonymen birge 2020 jyly Aljırde ótetin Konstıtýsııalyq sot tóreligi jónindegi dúnıejúzilik konferensııanyń 5-shi Kongresin ótkizýge daıyndyq týraly sóz boldy. Jańa demokratııa elderi konstıtýsııalyq baqylaý organdary Konferensııasynyń Tóraǵasy retinde Qaırat Mámı eýropalyq áriptesterdi belgilengen Kongreske qatysýǵa baılanysty Qaýymdastyqtyń qabyldaǵan sharalary týraly habardar etti.
Komıssııa basshylyǵy júrgizilip jatqan jumysqa qanaǵattanýshylyǵyn bildirip, Qazaqstanmen odan ári yntymaqtastyqqa daıyn ekenin aıtty.
«Egemen-aqparat»