Bekzat Sattarhanov 1980 jyldyń 4 sáýirinde Túrkistan qalasynda dúnıege kelgen. Úıdiń kenjesi kishkentaıynan áljýaz bolyp ósken soń, ata-anasy Bekzatty sport úıirmesine berýdi jón sanaıdy. Alǵashynda kúres úıirmesine qatysqan ol balýandar saıysyn qup kórmeı, 1995 jyldan bastap bylǵary qolǵapqa qumartty.
Bekzattyń bokstaǵy ǵumyry bar-joǵy bes jylǵa sozylǵan. Keıbireýler úshin jyldar boıy baǵynbaı ketken Olımpıada bıigi Bekzatqa bes jyldyń ishinde buıyrǵany da tań qalarlyq jaıt. Aınaldyrǵan eki jyldyń ishinde eresekter quramasyna ótip, 1998 jyly jastar arasyndaǵy álem chempıonatynyń kúmisin ıelengen Sattarhanovtan Sıdneı júldesin kútkender az edi. Tipti, ulttyq quramadaǵy tisqaqqan sportshylar bolmasa, Bekzatty jaqyn tanıtyn jankúıerlerdiń sany da kóp emes-tin.
Dese de, bala kúninen chempıondyq ataqty armandap, toqsanynshy jyldardyń qıyndyǵyna qaramaı jattyqqan Bekzat óz jeńisine senimdi bolyp shyqty.
Sıdneı Olımpıadasynda ol álemniń eń úzdik boksshylaryn júldeden qaqty. Atap aıtar bolsaq, alǵashqy aınalymda rýmynııalyq Ovıdıý Bobırnatty 14:5 esebimen jeńdi.
Ekinshi kezdesýde Ońtústik Afrıka Respýblıkasynyń ókilin 16:5 esebimen súrindirdi.
Sattarhanovtyń Sıdneıdegi eń basty jekpe-jegi dep Ramazan Palıanımen ótken kezdesýdi aıtýǵa bolady. Búkil túrik jurtynyń úmiti, Eýropa chempıony Palıanıdi 12:11 esebimen utqan soń, Bekzattyń myqtylyǵyn moıyndaıtyndar qatary kóbeıdi.
Jartylaı fınala marokkolyq Tamsamanıdi 12 upaı basymdyǵymen jeńgen qazaq batyryn fınalda basqa emes, 1999 jylǵy álem chempıony, amerıkalyq Rıkardo Hýares kútip turdy.
Áıtse de, azýly amerıkalyq ta Bekzatqa tisin batyra alǵan joq. Sıdneı Olımpıadasynyń fınalynda Sattarhanov Hýaresti 22:14 esebimen taza jeńip, Qazaqstanǵa tarıhı altyn júldeni syılady.
Sıdneı Olımpıadasynda bokstan Qazaqstan quramasynyń bas bapkeri mindetin atqarǵan Tursynǵalı Edilov Bekzat týraly esteliginde onyń tym aqkóńil bolǵanyn alǵa tartady.
«Bekzat... Bekzat sol Olımpıadada ósken bala ǵoı. Ol árbir kezdesýinen keıin jetile tústi, ár jekpe-jekten soń kúshine kúsh qosty. Olımpıadaǵa 12 kún erte bardyq. Sol kezde «Aǵa, anaý Ronaldınıý degen fýtbolshy emes pe? Ol da biz sııaqty qarapaıym adam eken ǵoı. Biz nege solardaı bolmaımyz? Anaý boksshynyń bizden qaı jeri artyq? Ony da jeńýge shama jetedi» dep únemi ózin-ózi qaırap júretin», - deıdi Edilov.
Bekzat Sattarhanov Olımpıada chempıony atanǵan soń bar bolǵany úsh aı ǵana ómir súrdi. Sol úsh aıda elimizdiń bar óńirin aralap, ózi úshin taqym qysqan qarapaıym halyqpen júzdesti. Eń sońǵy ret týǵan qalasyndaǵy merekelik jıynda «Jyldyń úzdik sportshysy» ataǵyn aldy da, anasymen qoshtasyp, máńgilik saparǵa kete bardy.
Búginde Túrkistan qalasyndaǵy móltekaýdanǵa Bekzattyń aty berildi. Sattarhanovtyń atyndaǵy sport mektebi de bar. Jyl saıyn Sıdneı batyryn eske alý maqsatynda bokstan halyqaralyq týrnır de ótedi. Munyń bári Bekzatty ortamyzǵa qaıta ákelmesi haq.
Bekzattyń ómirden ótkenine qansha jyl tolsa da, Sıdneı kóginde jaǵylǵan juldyz jarqyraı bermek...
Búgin «Habar» arnasynda Bekzat Sattarhanov týraly fılmniń tusaýkeseri ótetinin eske salamyz.