Sondaı-aq, Qazaqstan Prezıdenti Aljır, Qatar, Qytaı, Malaızııa, Úndistan elderiniń ekspozısııasy ornalasatyn halyqaralyq pavılondarmen tanysty.
Sońynda Elbasy keńes ótkizip, onda «Astana EKSPO-2017» ulttyq kompanııasy» aksıonerlik qoǵamynyń basqarma tóraǵasynyń halyqaralyq kórmege ázirlik barysy týraly baıandamasyn tyńdady.
«Qazirgi ýaqytta 112 el kórmege qatysatynyn rastady, sonyń ishinde 104 el ózderiniń komıssarlaryn taǵaıyndady. 94 kelisimge qol qoıylyp, 75 memleket ulttyq kúnin ótkizý úshin naqty datany aldyn ala belgiledi», – dedi A.Esimov.
Keńes barysynda Nursultan Nazarbaevqa arnaýly halyqaralyq komıssııa iriktep alǵan energetıka salasyndaǵy úzdik 24 jobaǵa qatysty sheshim jóninde málimdeldi. Bul jobalar kórmeniń arnaýly pavılonynda usynylatyny atap ótildi.
«Eki jylda asa aýqymdy jumys atqaryldy. Endi bul nysandardy jabdyqtap, tıisti kadrlardy daıarlaýymyz qajet. Bul – basty mindet, biz ony baqylaýda ustaıtyn bolamyz», – dedi Memleket basshysy.
Qazaqstan Prezıdenti keńes qorytyndysy boıynsha Premer-Mınıstrge «Astana EKSPO-2017» ulttyq kompanııasy» aksıonerlik qoǵamymen jáne Astana qalasy ákimdigimen birlesip, halyqaralyq mamandandyrylǵan kórme aıaqtalǵannan keıin onyń nysandaryn ári qaraı paıdalaný máselesin pysyqtaýdy tapsyrdy.