Seısenbi, 12 maýsym 2012 7:03
Taldyqorǵanda aýyr atletıkadan erler jáne qyzdar arasynda Qazaqstan chempıonaty aıaqtaldy. London Olımpıadasyna elimizdiń atynan baıraq kóterip baratyn tańdaýly segizdi anyqtaıtyn synǵa Sport jáne dene tárbıesi agenttiginiń tóraǵasy Talǵat Ermegııaevtiń ózi arnaıy keldi.
Olardyń arasynda Fransııada ótken álem chempıonatynda úshinshi ret altyn tájdi kıip turyp: “London Olımpıadasynyń altyny meniki. Basqalaryńnyń ıekteriń qyshymaı-aq qoısyn”, dep jahanǵa jar salyp ketken bizdiń jaly kúdireıgen arystan Ilıa Ilın bar.
Seısenbi, 12 maýsym 2012 7:03
Taldyqorǵanda aýyr atletıkadan erler jáne qyzdar arasynda Qazaqstan chempıonaty aıaqtaldy. London Olımpıadasyna elimizdiń atynan baıraq kóterip baratyn tańdaýly segizdi anyqtaıtyn synǵa Sport jáne dene tárbıesi agenttiginiń tóraǵasy Talǵat Ermegııaevtiń ózi arnaıy keldi.
Olardyń arasynda Fransııada ótken álem chempıonatynda úshinshi ret altyn tájdi kıip turyp: “London Olımpıadasynyń altyny meniki. Basqalaryńnyń ıekteriń qyshymaı-aq qoısyn”, dep jahanǵa jar salyp ketken bizdiń jaly kúdireıgen arystan Ilıa Ilın bar.
Osy Ilın Beıjiń Olımpıadasyna barar tusta da “altyn meniki» dep qarsylastarynyń júregin alyp qoıǵan. Azııa oıyndarynda da týy jyǵylyp kórgen emes. Oǵan kókórim shaǵynda-aq álem chempıonatynyń altynyn alǵan Zúlfııa Chınshanlony, álem chempıonatynyń altyndaryn qos-qostan alǵan Maııa Maneza men Svetlana Podobedovany, qazaq quramasynyń ázirge syrt kózden saqtap, jabýlap otyrǵan qos juldyzy – ońtústikqazaqstandyq Arlı Chonteıdi, aqtóbelik Farhad Harkıdi qosyńyz. Segiz joldamanyń ekeýin eseptemegende, osy aıdarly altaýdyń qaı-qaısysy da altyn medal úshin básekelesýge ábden laıyq.
Solaı boldy da. Zúlfııa Chınshanlo julqı jáne serpe kóterýde alty kezeginde múlt ketken joq. Ol qossaıys qorytyndysy boıynsha álem rekordyn jańartýǵa ábden daıyn, júıkesi temirdeı. О́te sabyrly.
Al Maııa Maneza sasqalaqtap qaldy. Oǵan Beıjiń olımpıadasynyń kúmis júldegeri, sportqa eńbek sińirgen sheber Irına Nekrasova aıtarlyqtaı qarsylyq kórsetti. Maııa julqı kóterýde 107 kelige tapsyrys bergende, Irına 112 keli surady. Maııa 115 kelimen toqtady. Irına 121 keli kóterip ketti. Baqandaı 6 keli artyq. Maneza serpe kóterýde myqty degenińizben, Irına ortasha salmaqty alyp jatsa, qurama bapkeriniń ekiudaı kúı keshetindigi anyq. Basynan asa sekirýge Irınanyń táýekeli jetpedi. Serpe kóterýde ol 136 keli, Maııa Maneza 140 keli surady. Ári qaraı belgili, Maııa 145 keli kótergende Irına 142 kelini eki kezeginde de kótere almaı, saly sýǵa ketti. Qossaıys qorytyndysy boıynsha Maııa Maneza úzdik shyqty.
Svetlana Podobedovaǵa da ońaı bolǵan joq. Julqı kóterýde 125 keli surap, keýdege qondyrar tusta tastap jiberdi. Bul psıhologııalyq turǵydan óte qıyn. Sportshynyń taýy shaǵylyp qalady. Ekinshi kezeginde 125 keli kótergenimen, Sveta 130 kelini baǵyndyra almady. Esesine serpe kóterýde ózin sýdaǵy balyqtaı erkin sezinetin qyzymyz 165 keli kóterip, álem rekordyn jańartty.
Qyzdar arasyndaǵy tórtinshi joldama ıesi 120 keli tartatyn Marııa Graboveskaıa men salmaǵy 72 keli Anna Nurmahamedovanyń saıysynda anyqtaldy. Marııa ózin kórsete almady, ári álemdik reıtıng boıynsha da Annadan kósh tómen. Endi Nurmahamedovaǵa ózin ózi qamshylaýǵa ýaqyt barshylyq.
Erler arasynda ózin erkin kórsetken ońtústikqazaqstandyq Arlı Chonteı boldy. Boıy alasa, biraq, qorǵasyndaı myǵym Arlı alty kezeginde múlt ketken joq. Al Farhad Harkıge psıhologııalyq jaǵynan áli de kómek kerek sekildi. Kúsh bar, tehnıka bar, sál asyǵyńqyrap ketedi eken. Álem chempıonatynyń qola júldegeri, shyǵysqazaqstandyq Vladımır Kýznesov babynda emes.
96 keli salmaqta qos joldama sarapqa salynatyndyqtan, tórt jigit aqyryna deıin qarjysty. Ilıa 180 keli kótergenimen, 187 kelini baǵyndyra almady. Úshinshi kezeginde 188 kelini alǵanymen, aıaǵynan nyq tura almaǵan. Tóreshiler eseptegen joq.
Almas О́teshov 180 kelini eki kezek ala almaı, úshinshisinde kóterip ketti. Ilıa men Almastyń qyzylordalyq jerlesi Aleksandr Zaıchıkov 181 kelimen toqtady. Álem chempıony, Almaty oblysynyń úkili úmiti Vladımır Sedov julqı kóterýde aıdy aspanǵa shyǵardy. 187 keli kóterdi. Ilıadan 7 keli artyq. Biraq, bul jigitińiz de júıke jaǵynan maqtana almaıdy eken. Sportshylardyń tilimen aıtqanda, “janyp ketti”. 217 kelige tapsyrys berip, úsh kezeginde de basy salbyrap ketken Sedov Olımpıada joldamasynan osylaısha kúder úzdi. Ilıa 225 keliden keıin 230 kelini erkin tolǵap, joldamany jan qaltasyna basty.
Serpe kóterýde polıak Sımon Koleskıdiń álemdik rekordy 232 keli. Ilıanyń kúshi erkin jetip turǵanymen, artyq táýekelge barmady. Onysy da durys-aý.
Endi sońǵy joldama Aleksandr Zaıchıkov pen Almas О́teshovtiń arasynda sarapqa tústi. Aleksandr 220 keli kótergende Almastyń qorjyny bos ketken. Ekinshi kezeginde aldy. Aleksandr 224 kelini eki tolǵaǵanda ala almaı, boldyryp toqtaǵanda Almas 225 keli kóterip ketti. Bizdiń bul baýyrymyzda kúsh degenińiz jetedi. Az-kem jetpeı jatqany jankeshti jattyǵý men temirdeı júıke. Áıtpese, 225 kelini erkin eńsergen bula jigittiń alǵashqy kezeginde 220 kelini kótere almaýyn qalaı túsindiresiń.
Sonymen, chempıonat aıaqtaldy. Sport jáne dene tárbıesi agenttiginiń tóraǵasy Talǵat Ermegııaevti áńgimege tarttyq. Talǵat Amangeldiuly Londonda kemi úsh altyn bastaǵan on úsh medal kútip otyrǵandaryn aıtty. Aýyr atletterdiń babynda ekendigine kóńili toǵaıǵan.
Baqtııar TAIJAN,
“Egemen Qazaqstan”.
TALDYQORǴAN.