Rýhty mahabbat asqaqtatady

Jas tolqyndy patrıottyq sezimge tár­bıeleý maqsatynda 2016 jyldyń aqpan aıynda «Baldáýren» respýblıkalyq oqý-saýyqtyrý ortalyǵynda qazaqstandyq jas patrıottar akademııasy qurylǵan bola­tyn. Jobanyń avtory – «Qurmet» orde­niniń ıegeri, Y.Altynsarın atyndaǵy akademııanyń korrespondent-múshesi Tildash Bıtýova. Maqsaty – jas quraqtaı jelkildep ósip kele jatqan jastardy «Máńgilik el» jalpyhalyqtyq ıdeıasy negizinde tárbıeleý. Mine, sol ýaqyttan beri akademııanyń taqyryptyq aýysymdaryna 1945 qatysýshy qabyldanǵan. Osy jerde boılaryna ult tarıhyn, ádebıeti men mádenıetiniń nebir qunaryn sińirgen jastar qazirgi kúni elimizdiń ár óńirinde patrıottyq baǵyttaǵy mańyzdy is-sharalarǵa belsene aralasýda.

Sál yqshamdap aıtqanda, akademııa mindeti jas tolqyndy óz Otanyn súıýge, onyń ótkeni men búginin saralaı salmaqtap, sanaǵa sińirýge yqpal etedi. Otanǵa adal bolýǵa, damýy men kórkeıýine óz úlesin qosýǵa tárbıeleıdi. 

Forýmda alǵashqy sózdi Bilim jáne ǵylym vıse-mınıstri Elmıra Sýhanberdıeva sabaqtady. Onyń aıtýynsha, patrıotızm – rýhanı jańǵyrýdyń berik irgetasy. 

– Elbasy Nursultan Nazarbaev ústi­mizdegi jyldy Jastar jyly dep jarııa­la­ýynyń zor mańyzy bar, – dedi ol. – Ke­leshek jas­tardyń qolynda. Jaı ǵana jastar emes, bi­limdi de bilikti, qarymdy da qabiletti jas tolqyn máńgilik eldiń muratyn júzege asyratyn bolady. Olar ekonomıkada da, rýhanı dúnıede de álemdegi eń damyǵan órkenıetti eldermen ıyq tirestirýi kerek. Biz qazirdiń ózinde álemdegi damyǵan elý eldiń ortasynan oıyp turyp óz ornymyzdy aldyq. Endigi arada sol jetistikti ári qaraı damytatyn jas tolqyn.

«El bolashaǵy – bizdiń qolymyzda» atty áleýmettik joba tanystyryldy. «Uly dala urpaǵy – jasaı bersin máńgilik» aıdarymen patrıot kóshbasshylardy toptastyrýǵa arnalǵan jumys túrleri júrgizildi. Ásershil jastar úshin forýmǵa kelgen qonaqtardyń tulǵalyq bitimi de zor áser etti. Máselen, ǵarysh­ker, Halyq Qaharmany Aıdyn Aıym­betov ortaǵa shyqqan kezde jastardyń qoshe­metinde shek bolǵan joq. 

– Ýaqyt bir ornynda turmaıdy. Urpaq almasady, ol zańdylyq, – dedi ǵaryshker. – Týǵan elimizdiń gúldenýi sizderdiń qoldaryńyzda. Táýelsiz elimizdiń tuǵyry bekemdelip, bola­shaǵy aıqyndalyp, máńgilik eldiń muratymen kún keshýdemiz. Sol izgi nıetti, asyl armandy alǵa jeteleıtin jas tolqyn. 

Belgili estrada ánshisi Tamara Asar basta­ǵan óner adamdary forýmnyń qyzǵylyqty ótýine atsalysty. Búgingi jastar da kez kel­gen ortany kórkeıtetin, shyraıyn kelti­retin ónerdi boıyna sińirgen tolqyn. Tárbıeleri de tálimdi. 

– Bizdiń mektepte de dál osyndaı taqy­ryptarda tárbıe saǵattary ótkiziledi, – deı­di Pavlodar qalasyndaǵy №35 mektep­tiń oqýshysy Daıyr Álkeev. – Biz bul joly sol bilimimizdi tereńdetip, rýhanı kókjıe­gimizdi baıyta tústik. Otandy súıý úshin onyń ótkenin bilgen jaqsy. Osy dalany kóziniń qarashyǵyndaı qorǵaǵan batyr babala­ry­myzdyń erlik isin oıymyzǵa toqysaq, ótkenge qurmet arta túsedi. Ári qazaqtyń batyr, ónerli, dana halyq ekendigin uqqan saıyn jas júregińdi maqtanysh sezimi kerneıdi. 

Aqmola oblysy, Býrabaı aýdany