Qarjy mınıstrliginiń málimetinshe, esepti kezeńde memlekettik bıýdjetke túsimder 3 trln 993 mlrd teńgeni qurady. Shyǵystar 4 trln 128 mlrd teńgege atqaryldy. 1 mamyrdaǵy jaǵdaı boıynsha 316 mlrd teńge kóleminde bıýdjettik qarajat qaldyqtary qalyptasty.
«Memlekettik bıýdjettiń kiristeri boıynsha eseptilik kezeńiniń jospary 103,9%-ǵa, onyń ishinde respýblıkalyq kirister – 100,9%-ǵa, jergilikti bıýdjetter – 113,5%-ǵa asyra oryndaldy», dedi Á. Smaıylov.
Respýblıkalyq bıýdjetke 2 127 mlrd teńge tústi. Bul jospardan 19 mlrd teńgege, al byltyrǵy jyldyń tórt aıynyń kórsetkishinen 345 mlrd teńgege artyq. О́sý qarqyny 119,4% qurady. Asyra oryndaý negizinen 13 mlrd teńge kólemindegi salyqtyq emes túsimder esebinen qamtamasyz etildi.
«Jergilikti bıýdjetterdiń kiristeri 91 mlrd teńgege artyǵymen oryndalyp, 761 mlrd teńgeni qurady. Asyra oryndaýdyń jalpy somasynyń 74 mlrd teńgesi jergilikti salyqtarǵa tıesili. Memlekettik bıýdjet shyǵystary 97,8%-ǵa, respýblıkalyq bıýdjet shyǵystary – 98,3%-ǵa jáne jergilikti bıýdjetter – 98%-ǵa atqaryldy», dedi Á. Smaıylov.
Qarjy mınıstri atap ótkendeı, aǵymdaǵy jyly óńirlerge bólinetin nysanaly transfertter kólemi 1 638 mlrd teńgeni quraıdy. Bıýdjetti naqtylaý kezinde nysanaly transfertterdiń somasy 873 mlrd teńgege ulǵaıtyldy. Olar azamattyq qyzmetshilerdiń, onyń ishinde muǵalimderdiń, medısına, áleýmettik sala qyzmetkerleriniń jalaqysyn ósirýge, kóp balaly otbasylarǵa ataýly áleýmettik kómek sharalaryn kúsheıtýge, olarǵa turǵyn úıdi salýǵa, «Aýyl – el besigi», «Jas maman» jobalaryn iske asyrýǵa baǵyttaldy.
«Esepti kezeńde jergilikti bıýdjetterge 266 mlrd teńge bólindi. Onyń ishinde 13 mlrd teńgesi – jańadan bólingen qarajattar ataýly áleýmettik kómekke jáne turǵyn úı salýǵa aýdaryldy. Jergilikti atqarýshy organdardyń aldyn ala derekteri boıynsha nysanaly transfertter 96,5%-ǵa ıgerildi», dedi Á. Smaıylov.
Sonymen qatar, 4 aıdyń qorytyndysy boıynsha kameraldyq baqylaýmen jalpy somasy 3 trln 603 mlrd teńgege 592 myń memlekettik satyp alý prosedýralary qamtyldy. 11 855 prosedýra boıynsha somasy 191 mlrd teńgege memlekettik satyp alý týraly zańnamany buzýshylyq anyqtaldy. Osy buzýshylyqtardy joıý úshin memlekettik aýdıt obektilerine 11 758 habarlama joldandy. Nátıjesinde 175 mlrd teńgege buzýshylyqtar joıyldy.
Á. Smaıylov sonymen qatar Jekeshelendirýdiń keshendi josparynyń oryndalý barysy týraly baıandady. Bıyl 125 nysan satylýy tıis. Esepti kezeńde 83 nysan satylýǵa qoıyldy. Onyń ishinde 31 mlrd teńgege 25 nysan satyldy. 58 nysan satylý barysynda.