Murajaı men kolledjderde kórme uıymdastyrylyp, reseılik ónerpazdardyń týyndylary tamashalandy. Qazaqstan halqy Assambleıasy men Zaýrale halyqtary assambleıasy arasynda ekijaqty kelisimderge qol qoıyldy.
«Qorǵan oblysynyń halyq assambleıasy osydan 19 jyl buryn quryldy. Sodan beri óńiraralyq beıbitshilik pen yntymaqtastyqty nyǵaıtýǵa laıyqty úlesin qosyp keledi. Soltústikqazaqstandyq áriptesterimizben yntymaǵymyz jarasyp, mádenı, rýhanı, taǵy basqa salalar boıynsha is-tájirıbeler almasamyz, úırenerimiz kóp. Osy jyldy «Dostyq jyly» retinde jarııalaı otyryp, birqatar tanymdyq is-sharalar uıymdastyrýǵa ýaǵdalastyq. 9 maýsymda ótetin prezıdent saılaýyna bizdiń óńirden 20-dan astam adam baqylaýshy qatysady», deıdi Zaýrale halyqtary assambleıasy keńesiniń tóraǵasy Vladımır Ýfımsev.
Qorǵan qazaqtarynyń ulttyq-mádenı avtonomııasynyń jetekshisi Qaırat Oralovtyń aıtýynsha, bul jolǵy sapar barysynda aqparattyq-gýmanıtarlyq aksııalar qosa qamtylypty. Búginde oblysta 12 myńǵa jýyq qazaq turady. Qaı salada bolsyn olar tabysty eńbek etip júr. Ana tilin balalarmen qatar eresekter de úırenedi.
Qorǵandyq qonaqtar soltústikqazaqstandyqtardy 12 maýsymda ótetin Reseıdiń memlekettik merekesine shaqyrdy. Bul kúni Zaýrale halyq assambleıasy 17 etnos ókilderiniń qatysýymen aýqymdy merekelik sharalar uıymdastyryldy.
Soltústik Qazaqstan oblysy