Ustaz bolsam dep edim...

Onda da asa baı, áýezdi, tol­ǵaýy toqsan qazaq tiliniń muǵa­limi. Jas júrekti jaýlaǵan aıaly arman da osy. Al arman shyńyna shyǵý úshin osy bastan talmaı ta­­laptaný kerektigin de jaqsy biledi. Talaptanyp ta júr. Qazaq tilin birshama jetik meńgergen Elızaveta Sergeevna birneshe jyldan beri aýdandyq, oblystyq ózge ult ókilderi arasynda qazaq tilinde ótetin baıqaýlarda báıgeni shappaı alatyn deńgeıge jetken. Abaı oqýlary respýblıkalyq sa­ıysyna da qatysypty. 

– Respýblıkalyq saıys qa­shyq­­tyq arqyly ótkizildi, – deı­di Elızaveta. – Bir ókinishtisi, jalǵyz balym jetpeı qal­dy. Biraq odan unjyrǵam tús­ken joq, qaıta áli de kem túsip jat­qan olqylyǵymdy oı ele­ginen ótkizip, til ustartý jumys­taryn údete tústim. Maǵan qazaq tili óte­ unaıdy. Biz úıde alty balamyz, qazaq tilinde sóıleıtin men ǵa­na. Tipti áke-sheshem de bi­le qoı­maıdy. Al men bolsam birin­shi sy­nyptan bastap til úırenýge umtyldym. Qazir nege ekenin de túsindirip bere almas edim. Áıteýir ynta-yqylasym zor. 

Tilge qumar qyzdyń tir­shi­liktegi maqsat-muraty da kisi qy­zyǵarlyq. Orta mektepti aıaq­taǵan soń Kókshetaý qalasyndaǵy Shoqan Ýálıhanov atyndaǵy mem­lekettik ýnıversıtetiniń fılologııa fakýltetine túspek. Sóıtip qazaq tili men ádebıetiniń mamany bolyp shyqsam deıdi. Ádebıet týraly áńgime óz aldyna, uly Abaıdyń «Eskendir», «Masǵut», «Ázimniń áńgimeleri» poemalaryn jatqa oqıtyn jas qyz óz óleńderin oqyp berdi. Balaýsa sezim, móldir muń. Tabıǵat, keı­bir qurbylary jaıyndaǵy tyr­naqaldy týyndylary. Al qazaq poezııasynyń kórnekti ókil­de­riniń kóptegen óleń-jyrlaryn jatqa oqıdy eken. Oqyǵanda da eshbir aksentsiz, kádimgi qalyń qazaqtyń ishinde ósken qazaq balasy tárizdi. Tipti tilinde bir mú­kis joq.

Qazaq tilinen ustazy Anar Qo­jahmetova sabaq beredi. Tilg­e degen mahabbatyn oıatqan, qush­tarlyǵyn arttyrǵan da osy ustazy. Árıne, bul jerde óziniń ynta-yqy­lasy da aıtarlyqtaı ról atqarǵany kúmánsiz. Qalaı bolǵan kún­de de, qazaq tilinde jatyq, uǵy­nyqty sóılep tur­ǵan jas qyzdyń talaby tas jar­ǵandaı. 

– Qurbylarymnyń kóbi qazaq­tyń qyzdary. Solar­men kóbirek sóılesip, til jattyqtyrýǵa ty­ry­samyn. Kóshede de ata-áje­lermen qazaqsha sóılesemin. Me­ni tanymaıtyndardyń kóbi ta­ńyrqap jatady. Kórshilerimiz de qazaqtar. Olar meniń óz tilderinde sóı­lesetinimdi jaqsy biledi. Sol úshin árdaıym qurmet kórsetip jatady, – deıdi Elızaveta. 

Tilimizdi qurmettegen qarsha­daı qyzdyń el qurmetter kezeńi alda. Arman asýyna shyǵyp, qazaq tili men ádebıetiniń muǵalimi bolyp jas urpaqty tárbıelegen kezde eń úlken qurmettiń kórse­tilerine senemiz.  Aqmola oblysy, Birjan sal aýdany