Eki kún qatarynan qoıylǵan premerada teatrda ıne shanshar oryn bolmady. Oraldyq kórermen áıgili qyrǵyz jazýshysynyń qalamynan týǵan shyǵarmany ystyq yqylaspen qabyldady.
- Kesheli beri bizdiń óńirimizde eleýli mádenı oqıǵa – jańa qoıylymnyń tusaýkeseri bolyp jatyr. Shynynda da Hadısha Bókeeva atyndaǵy qazaq drama teatrynyń ár premerasy – biz úshin úlken jetistik. Onyń ústine bárimizge tanymal Talǵat Temenov aǵamyz Nur-Sultan qalasynan arnaıy kelip, oraldyq teatr ujymymen bir aıdan beri qoıan-qoltyq jumys istep, osyndaı tamasha dúnıeni Aq Jaıyq kórermenderine usynyp otyr. Biz buǵan óte qýanyshtymyz. Talǵat aǵamyzǵa zor alǵysymyzdy bildiremiz. Bizdiń óńirge kelgen óner adamdary jıi aıtyp júrgendeı, Oraldyń aýdıtorııasy bólek, kórermenderi erekshe. Shynaıy rızashylyqtan týǵan yqylasymyzdy qabyl alyńyz! – dedi Batys Qazaqstan oblysynyń ákimi Altaı Kólginov rejısser Talǵat Temenovke alǵys hat pen gúl usynyp turyp.
Kópshilik qoshemetine bólengen Talǵat Temenov te sahnada turyp tolqı sóıledi:
- Mende traıbalızm joq, biraq jeti ata-babam osy óńirde, Bókeılikte jatyr. Sondyqtan, aqyn aıtqandaı, «Meıliń batyr, Meıli ǵalym, danasyń, Báribir sen týǵan jerge balasyń!» degen ras eken. «Mahabbat beketi» fılmindegi basty keıipkerdiń esimi Oral bolýy da perzenttik yqylasymnyń belgisi bolatyn. Osy kezge deıin álemniń 80 elin araladym, óner kórsettim, biraq atajurt sahnasynda tuńǵysh ret qoıylym qoıǵanym osy eken. Soǵan yńǵaısyzdanyp ta turmyn, - deıdi rejısser.
Bir saǵattan sál asatyn ýaqytqa ǵana sozylǵan spektakl barysynda kórermen bir qýanyp, bir jylap, san túrli kúıge túsedi. Qazaqstan Jazýshylar odaǵynyń múshesi Darıǵa Mushtanova aıtqandaı, «О́mirdiń ózindeı shıyrshyq atyp kóz aldyńnan ótip jatqan xıkaıat tebirentpeı, kózińe jas aldyrmaı qoımaıdy. Áp- ádemi bastalǵan ómirin óz erkimen qor etip, mazdaı janyp turǵan baqyt shyraǵyn ózi úrlep óshirip tastaǵan adamnyń endi túzetýge kelmes qatesine kýá bolasyz. О́zine rııasyz senip, eteginen ustaǵan súıgen jaryna senimdi serik te bola almaı, týǵan ulynyń basqa adamdy áke deýine de ózi sebepker bolǵan talaı Ilııastar búgingi qoǵamda da júrgeni ras qoı».
Qoıylymnyń basty keıipkeri Ilııas rólin – Jasqaırat Valıýllıev, Áseldi – jas ónerpaz Nurjııan Hasanova somdady. Sondaı-aq teatrdyń tanymal ártisteri Nargız Shadyeva, Musaǵalı Bektenov, Gúljııan Shyntemir de óz beınelerin nanymdy alyp shyqty.
Jańa qoıylymdy tik turyp kórip, ony sahnalaǵan rejısser men sýretshige, artısterdi gúlmen kómkergen kórermen qaýym taǵy bir qýanyshty jańalyqqa kýá boldy. Batys Qazaqstan oblysynyń ákimi Altaı Kólginov Oral qalasynda jańa Mádenıet saraıy salynatynyn, barlyq sheshimder qabyldanyp, baıqaý ótkenin habarlady. Jańa mádenıet oshaǵynyń qurylysy maýsym aıynda bastalmaq.
Batys Qazaqstan