– Gúljanat Qoıbaǵarqyzy, Prezıdent sózi sizge qandaı oı saldy?
– О́zińiz qyzmet isteıtin elimizdiń bas basylymy – «Egemen Qazaqstan» atalǵan rásimge oraı «Sabaqtastyq saltanaty» degen bas taqyryp qoıypty. Memleket basshylary aýysqan kezde bir jaǵyna bura tartpaıtyn sabaqtastyqtyń bolýy, elimizdiń Tuńǵysh Prezıdenti – Elbasy belgilep bergen sarabdal saıasattyń odan ári jalǵasýy turaqty ári qaýipsiz damýdyń basty kepili dep sanaımyn. Buǵan deıingi reformalardyń jańasha bir qyrynan baıyptalyp, tereńdeı túsetini úlken mereı. Qoıǵan alǵashqy saýalyńyzǵa qaıtarar jaýabym osyndaı.
– Respýblıka Prezıdenti belgilep bergen basty baǵyttar jóninde ne aıtar edińiz?
– Táýelsizdik jyldarynda el ekonomıkasyn alǵa qaraı damytýdyń jańa tuǵyrnamasy jasalyp, júzege asa bastady. Mundaı ózgerister áleýmettik sala men bloktyń ósip-órkendeýine de oń septigin tıgizdi. Áıtse de áleýmettik jáne rýhanı turǵydan jańǵyrý isinde barlyq másele sheshimin taýyp úlgerdi deýge, árıne bolmaıdy. Osy oraıda elimizdiń jańadan saılanǵan Prezıdenti Qasym-Jomart Toqaev óziniń jolbastar sózinde áleýmettik salaǵa, sonyń ishinde qazaqstandyqtardyń tabysy men turmysyn odan ári jaqsartýǵa qatysty naqty baılamdar jasaǵany kókeıge birden qondy.
Budan shyǵatyn basty túıin – aldaǵy ýaqytta jańa jumys oryndary kóbeıip, halyqty tıisti jalaqymen qamtý, sondaı-aq muǵalimder men dárigerler mártebesin kóterý jóninde naqty qadamdar jasalatyndyǵy. Bir sózben aıtqanda, halyqtyń kókeıinde júrgen máselelerge Memleket basshysy tarapynan aıryqsha kóńil bólinetini qýanysh sezimine bóledi.
Sondaı-aq buǵan deıin Qazaqstan qoǵamynda ulttyq tabystyń ádil bólinýine qatysty árqıly pikirler bolǵany ras. Osyndaı kópshilikti tolǵandyrǵan máselege de aıqyndyq pen jarııalylyq bergeni atap aıtýǵa turarlyq. О́ıtkeni onyń strategııalyq máni men mańyzy óte joǵary. Sonymen birge Qasym-Jomart Toqaev 10 baǵytqa baılanysty sózinde bıýdjet qarajattaryn únemdi túrde jumsaý, ony eń aldymen paıdasy men tıimdiligi joǵary áleýmettik serpin bere alatyn jobalarǵa baǵyttaý kerektigin túıindep berdi.
Qazirgi kezde kópshiliktiń kókeıinde júrgen basty problemalardyń biri –ekologııalyq ahýal ekeni belgili. Prezıdenttiń bul máselege de basa nazar aýdarǵany el-jurtqa, olardyń densaýlyǵyna degen janashyrlyqtan týǵan sheshim ekeni aıqyn. Memleket basshysy Aqtóbe oblysyna sapary kezinde de óńir ekologııasyn jaqsartý men qorshaǵan ortany kózdiń qarashyǵyndaı qorǵaý jónindegi oı-pikirlerin ortaǵa tastaǵan bolatyn. Aqtóbe – óndirisi men ónerkásibi jan-jaqty damyǵan óńir. Mundaǵy kásiporyndardan shyǵatyn zııandy óndiristik qaldyqtardy retteý men joıý isinde de óz sheshimin kútken máseleler az emes. Bul rette Prezıdent pikiri isti alǵa jyljytýdyń basty tutqasy bola alatynyna eshqandaı kúmánimiz joq.
– Prezıdent atap kórsetken 10 baǵyttyń ishinde sizge bir taban jaqyndaý, janyńyzǵa birden uıalaı ketken bir-eki baǵytty atap kórsete alasyz ba?
– Árıne, eldiń erteńi – jastar. Olarǵa memleket tarapynan qamqorlyq pen qoldaý týǵyzylsa, bul senimdi jastar tolyqtaı aqtaıtynyna senim mol. Osy oraıda Prezıdenttiń óz qyzmetine resmı túrde kirisý kezinde jastarǵa qatysty baǵdarlamalyq baǵytta aıtqan sózi janymyzdy jadyratty. Men – eń aldymen anamyn. Otbasymyzda úsh bala ósip keledi. Al tutastaı elimizde jas tolqynnyń jelkildep ósken quraqtaı úlken legi egemen elimizdiń ósip-órkendeýine óz úlesterin qosýdy maqsat etse, Prezıdent atap kórsetkendeı, elimizdiń bolashaǵy da jarqyn.
Bizdiń jastarymyz maqsatker, eńbeksúıgish, kreatıvti, sondyqtan Qazaqstannyń bolashaǵy senimdi qolda dep oı túıedi Qasym-Jomart Kemeluly. Ekinshiden, 10 baǵyttyń ishinde qazaqstandyqtardy qoljetimdi baspanamen qamtý jónindegi máseleniń de orny bólek ekeni haq. Sondaı-aq buǵan deıin respýblıkanyń Tuńǵysh Prezıdenti – Elbasy bastap bergen baǵyttar odan ári jalǵasatyny meni jyly sezimge bóledi.
– Áńgimeńizge rahmet.
AQTО́BE