«Medısınalyq-sanıtarlyq kómek kórsetetin jetkizýshiler sany 2017 jyly 501 bolsa, 2019 jyly bul kórsetkish 550-ge jetti. Osydan eki jyl buryn jetkizýshiler arasynda 307 memlekettik, 104 jeke menshik uıym bolsa, búginde 372 memlekettik, 178 jeke menshik klınıkamen jumys istep jatyrmyz», - dedi Qor basshysy Almatyda saladaǵy túıtkildi máselelerdi talqylaýǵa arnalǵan jıyn barysynda jýrnalısterge.
Aıtýynsha, bolashaqta konsýltatıvtik-dıagnostıkalyq kómek, ońaltý men palıatıvtik kómekke bólinetin qarjy da kóbeıedi. Sondyqtan bul sektorlardy da bızneske tıimdi salalar qataryna jatqyzýǵa bolady.
«Jeke menshik sala memlekettik tapsyrysty oryndaýǵa emhanalarmen sýbmerdigerlik kelisimshart bekitý arqyly da qatysa alady. Sóıtip, olar qolda bar resýrstardyń arqasynda sala mamanynyń qyzmetin, dıagnostıka men zertteýdiń belgili bir túrlerin kórsete alady», dedi Aıbatyr Jumaǵulov.
Densaýlyq saqtaý mınıstri Eljan Birtanovtyń aıtýynsha, jyl basynan beri emhana qyzmetin damytý maqsatynda birqatar tarıfterdi kóterdi. Olar negizinen dárigerler men medısına personalynyń jalaqysyn ósirýge baǵyttaldy. Jyl sońyna deıin taǵy birqatar tarıf túrlerin ósirý josparda bar. Jalpy, tarıfterdi teńestirý kórsetiletin qyzmet sapasy men qoljetimdiligin arttyryp, jeke menshik sektordy memlekettik tapsyrysty oryndaýǵa, medısınalyq saqtandyrý júıesine qatysýǵa yntalandyrady.
«Byltyrdan beri tarıfterdi jetildirý, aımaqtar arasyndaǵy tarıf alshaqtyǵyn joıý jumystary júrip jatyr. Atap aıtqanda, tarıfterdi esepteý ádistemesi de túbegeıli ózgermek. 2021 jyldan bastap tarıfterdi qalyptastyrý barysynda amortızasııalyq shyǵyndardy eskerý josparlanyp otyr», - dedi mınıstr.
«Medısınalyq qyzmetterdiń naryqtaǵy baǵasy men memlekettik tarıfıkatordy salystyrsaq tarıf qalyptastyrý tásilderiniń arasyndaǵy alshaqtyqty baıqaýǵa bolady. Mysaly, kepildendirilgen tegin medısınalyq kómek sheńberinde búırekke jasalatyn ÝDZ úshin 804 teńge tólenedi. Al, memlekettik medısına uıymdarynda ÝDZ aqyly jasatý úshin orta eseppen 2 230 teńge tóleý qajet», - dep qorytty Eljan Birtanov.