Sáýlettik jobanyń saltanatty ashylý rásimine qala ákimi Ǵabıdolla Ábdirahymov, máslıhat depýtattary, sondaı-aq, shahar turǵyndary, zııaly qaýym ókilderi, óner mektebiniń oqytýshylary men shákirtteri qatysty. Alqaly jıynda shahar basshysy Dombyra kúniniń mańyzyna toqtalyp, qalalyqtardy jańa eskertkishtiń ashylýymen quttyqtady.
«Osydan 1 jyl buryn Elbasy Nursultan Ábishuly Nazarbaevtyń sheshimimen shilde aıynyń birinshi jeksenbisi – qazaqtyń kıeli de qasıetti qazynasy – Ulttyq dombyra kúni bolyp belgilengen bolatyn. Ulttyq dástúr, mádenıet jáne biregeılik ıdeıalarynyń tóńireginde qoǵamymyzdy odan ári biriktirý úshin jasalǵan osynaý merekege oraı ákimshilik-iskerlik ortalyǵy aýmaǵynda dombyra eskertkishi boı kóterip otyr. Bul barsha shymkenttikter úshin qýanyshty kún. Ár úıdiń tórinde ilýli turatyn xalqymyzdyń jan serigi ulttyq aspabymyzdyń qońyr úni máńgilik úzilmesin. Dombyra aspap qana emes, qazaqtyń jany, fılosofııasy deýge bolady. Dombyranyń úninen-aq kóp jaıtty túsinemiz. Bul qundylyq qala turǵyndaryna, jas urpaqqa serpin beredi dep oılaımyn», dedi Ǵabıdolla Rahmatollauly.
Merekege oraı eskertkish aldynda kúmbirlegen dombyra únimen úndesip halyq ánderi, Qazaqstan kompozıtorlarynyń shyǵarmalary oryndaldy. Merekeniń saltanatyn asyra túsken aıtysker aqyn Birjan Baıtýov arnaý aıtyp, Dombyra kúni ulttyq rýhymyzdy asqaqtatatyn mereke bolýy tıis ekenin tilge tıek etti. Bıiktigi 7 metrdi quraıtyn tuǵyr ulttyq naqyshtarmen bezendirilgen. Bul halqymyzdyń mýzykalyq aspabyn dáripteýge arnalǵan Shymkenttegi alǵashqy iri eskertkish. Aıta keterligi, eskertkishti ornatýǵa qala máslıhatynyń depýtattary, atymtaı jomart mesenattar qoldaý kórsetken. ShYMKENT