Elorda ákimi kezekti ret úlestik qurylys nysandarynyń qurylys alańdaryn tekserip, olardyń úleskerlerimen áńgimelesti dep habarlaıdy ákimdiktiń resmı saıty.
Altaı Kólginov "Jaǵalaý-3" TK (A-J bloktary), Syǵanaq kóshesi, Qorǵaljyn tas jolynyń ońtústigine qaraı ornalasqan "Jaǵalaý-4" TK qurylysy ornynda boldy, sondaı-aq Turan dańǵylynyń batysyna qaraı Syǵanaq kóshesi (jobalanatyn) boıyndaǵy salynyp jatqan "Shyǵys" TK máselelerimen tanysty. Bul turǵyn úılerde 1500-den astam úlesker óz páterlerin kútip júr. Kezdesý barysynda olar qurylystyń sozylýyna qatysty narazylyqtaryn bildirdi. Úleskerlermen áńgimelese kele, ákim óz tarapynan ákimdik nysandardy tapsyrýdyń bekitilgen merzimi oryndalýy úshin barlyq sharalardy qoldanatynyn atap ótti. Sonymen qatar, ol qurylys salýshylar óz qarajatyn úılerge salǵan adamdardyń senimin aqtamaǵanyn, olar uzaq jyldar boıy qurylysy aıaqtalmaǵan, sondaı-aq kóptegen kemshiligi bar ekenin atap ótti.
"Qurylysty salýshylar úleskerlerdiń aqshasyn paıdalana otyryp, úı salý mindetin óz moınyna aldy, biraq adamdardyń senimin aqtamady. Mundaı teris pıǵyldy adamdarmen aldaǵy ýaqytta jumys istemeıtin bolamyz. Endi atalmysh máseleni óz kúshimizben jetkizetin bolamyz. Eń bastysy qurylys jumystaryn júrgizý úshin memlekettik qarajat bólindi. Qurylysty aıaqtaý jáne úleskerlerdiń uzaqqa sozylǵan máselelerin túpkilikti sheshý prosesin baqylaýda ustaımyz", - dedi ákim.