Abyraly ólkesi – óner kenishi. Shertpe kúıdiń sheberi Táttimbet, án dúldilderi – Ámire Qashaýbaev pen Júsipbek Elebekov, qazaq halqynyń maqtan tutqan bulbul qyzy – Bıbigúl Tólegenova Abyralydan túlep shyqqandar. Osylarǵa qarap-aq, ólke ónerin baǵamdaı berińiz. Onyń syrtynda ujym 1994 jyly Mádenıet mınıstrliginiń uıǵarymymen Almaty qalasynda «Abyraly aýdanynyń kúnderin» ótkizip, teatr janynan qurylǵan «Qaınar» jáne «Meızek» ansamblderi osy joly halyqtyq ataqqa qol jetkizgeni taǵy bar. Kelesi 1995 jyly ujym elimiz atynan Túrkııaǵa baryp túrki tektes elder óner festıvaline qatysyp, aýyl abyroıyn asyrǵan.
2008 jyly qaınarlyq órender týma talant ıesi Ámire Qashaýbaevtyń 120 jyldyǵyna baılanysty «Parıjge barǵan dombyra» atty spektakdi bıik deńgeıde sahnalap, 2009 jyly respýblıka kóleminde ótken mártebeli baıqaýǵa «Abylaı han» pesasyn qoıyp, bas júldeni jeńip alǵan.
Joǵarydaǵy óner saıysynda teatr ónerpazdary Bısat Shaǵyrov, Ulan Ysqaqov pen Baýyrjan Tókenov jańa qyrlarynan tanylsa, ujymnyń kórkemdik jaǵynan ósýine Mádenıet úıiniń dırektory Qudaıbergen Turysbekovtiń sińirgen eńbegi óte zor.
Jaqynda teatrdyń mereıtoıyna oraı Qaınar aýylynda alqaly jıyn ótti. Onda oblystyq Aqsaqaldar keńesi tóraǵasynyń orynbasary jáne aýyl teatryn uıymdastyrýshylardyń biri Dúısenbaı Qoshqarbekuly sóz sóılep, aýyl mádenetiniń bıik dárejege kóterilýine úles qosqan el azamattary Tóljuma Arystanbaev, Meırambek Isataev, Bolatbek Janbolatov t.b. azamattardyń eńbegin eske alsa, jıynnyń qurmetti qonaǵy Semeı qalasynyń ákimi Ermak Sálimov Qaınar halyq teatry 1969 jyldyń jeltoqsan aıynda respýblıkalyq baıqaýda «Halyq teatry» ataǵyn jeńip alǵanyn taǵy bir eske saldy.
Saltanatty jıyn barysynda qaınarlyq bir top ónerpazdarǵa syı-joralǵylar usynylyp, mereıtolyq tósbelgimen marapattalyp, óner ardagerlerine teatry ujymy ázirlegen estelik foto-albom syıǵa berildi. Mereıtoıdyń sánin keltirgen qonaqtar dástúrli ánshi Erlan Rysqalı, belgili ónerpaz Nurıden Qusmanov, kúıshi-sazger Saǵyndyq Ernap, ánshi Anar Qalıevalar el qoshemetine bólendi.
Janat TÚGELBAEV,
Qazaqstannyń qurmetti jýrnalısi
Shyǵys Qazaqstan oblysy, Abyraly aýyly