Beıbit kúnniń batyrlary týraly qansha aıtsań da artyq emes. Taıaýda Shortandy aýdanynyń turǵyny Denıs Sytnık sýǵa batyp bara jatqan bir bozbalany ajaldan arashalap qaldy.
Oqıǵa Myqtykól kólinde bolǵan. О́z basyn qaterge tigip, tilsiz jaýmen arpalysqan azamattyń erligi eleýsiz qalǵan joq. Aqmola oblystyq Tótenshe jaǵdaılar jónindegi departament basshysynyń alǵys hatymen marapattaldy.
Oblysta uzyn-yrǵasy 750-ge jýyq ózen-kólder men sý qoımalary bar. Olardyń basym bóliginde shomylýǵa tyıym salynǵan. Myqtykól de osyndaı tyıym salynǵan kólderdiń qatarynda. Degenmen qara qarǵanyń mıy qaınaıtyn ystyqta kólge shomylýshylardyń qatary az emes. Denıs Sytnık sýǵa batyp bara jatqan bozbalany baıqap qalǵan. Kóp oılanbastan, batyp bara jatqan azamatty qutqaryp, alǵashqy kómek kórsetken. Qazirgi ýaqytta ajaldan aman qalǵan Elaman Boltabektiń jaǵdaıy jaqsy.
– Kún ystyq bolǵan soń sýǵa túsýge baryp edim. Jaǵalaýdaǵy adamdardyń janushyra aıǵaılap turǵanyn estidim. Qarasam, bireý sýǵa batyp bara jatyr eken. Álgi kisini áreń degende sý túbinen taýyp, qarmanyp jaǵaǵa jeteledim. Sátin salǵanda medısına qyzmetkerleriniń jolyǵa ketkeni. Áıteýir kóretin jaryǵy bar eken, aman qaldy. Men óz áreketimdi erlik dep eseptemeımin, – deıdi Denıs Sytnık.
Bıyl oblysta 26 adamnyń sýǵa ketkendigin aıta ketelik. О́tken jylmen salystyrǵanda 7 adamǵa kóp. Bir aıta keterligi, oqys oqıǵanyń kópshiligi shomylýǵa ruqsat etilmegen ózen-kólderde bolǵan.
– Ruqsat etilmegen aımaqtardaǵy tótenshe jaǵdaılardyń aldyn-alý maqsatynda shomylý naýqany bastalǵaly 1400-ge jýyq reıd júrgizdik. Erejelerdi buzǵan 390 adam ákimshilik jazaǵa tartyldy. Sondaı-aq 25 myń adamdy qamtyǵan ınteraktıvti jumystar júrgizildi, – deıdi oblystyq Tótenshe jaǵdaılar jónindegi departamenti jasaǵynyń bastyǵy Ashat Ákeljanov.
Maýsym bastalǵaly qutqarýshylar 92 adamdy ajal aýzynan aman alyp qalǵan. Olardyń 21-i kámeletke tolmaǵandar.
Aqmola oblysy