Qar qursaýynda qalǵan alpınıster izdestirilýde

Qazirgi ýaqytta taýdyń eteginde jańbyr tolastamaı tursa, joǵary jaǵynda qar jaýýda. Sondaı-aq izdestirý jumystaryn birlesip júrgizý úshin qyrǵyz alpınısteriniń toby jasaqtaldy. N.Nurahmet joǵary mamandandyrylǵan qazaqstandyq qutqarýshylar toby Almaty oblysynyń «Qarqara» bazalyq lagerine 19 tamyz kúni tús áletinde, saǵat 13.20-da jetkenin habarlady. Alpınısterdi ári qaraı Qyrǵyzstanǵa jetkizý úshin Qazáýequtqarýdyń Mı-171 borty daıyn tur.

Eske sala keteıik, 4 ta­myz­da «Aqsaı Trevel» tý­r­ıs­tik kompanııasy Je­ńis shyńyna shyǵýdy uıymdastyrǵan bolatyn. Bul taýdaǵy joryqqa úsh adamnan turatyn qazaqstandyq alpınıster de qatysyp, 14 tamyzda atalǵan shyńǵa shyqqan bolatyn. Alaıda sol kúni jergilikti tabıǵat raıy kúrt buzyldy. 15 tamyz kúni tańǵy saǵat 08.15-te top músheleri radıobaılanys arqyly sońǵy ret baılanysqa shyǵyp, alpınısterdiń biri Aleksandr Chechýlınniń ókpe qabynýynan qaza bolǵanyn habarlady. Al shatyrlar men quraldardy jel ushyryp ketken. Toptyń qalǵan múshe­leriniń ómirin saqtap qalý úshin Murat О́tepbaev pen Andreı Korneev qardan úńgir qazyp, boı tasalaǵan kórinedi.

Almaty qalasynyń ákimi Baqytjan Saǵyntaev ta áleýmettik je­­li­­­degi pa­raq­shasynda almatylyq al­­pı­nıs­terdi izdeý-qutqarý ju­mys­­ta­ry bas­talǵanyn, Han Táńiri jaǵynan qut­qa­rý tikushaǵy ushqanyn jazǵan bolatyn. Alaıda tikushaq­tyń eń joǵary kóteri­le­tin bıiktigi 4500 metrden aspaı­tyndyqtan, ári qaraı izdeý ju­mystaryn eriktiler men qutqarý toby jalǵastyrýǵa týra keledi.

Al Syrtqy ister mınıs­tr­liginiń resmı ókili Aıbek Sma­dııarovtyń ha­bar­la­ýyn­­sha, Qyrǵyzstannyń Ys­tyq­­­­kól oblysyndaǵy Jeńis shy­ńy­na shyqqan úsh qazaq­­standyqtyń joǵal­ǵany týraly aqparat Bishkektegi Qazaq­stan konsýldyǵyna 17 tamyzda kelip túsken. Murat О́tepbaev, Andreı Korne­ev jáne Aleksandr Chechýlın esim­di Qazaqstan azamattarynyń úsheýi de ká­sibı ári tájirıbeli alpınıster.

Dıplomattar atalǵan oqıǵa týraly Qyrǵyzstan men Qazaqstannyń tótenshe jaǵdaı qurylymdaryna j­edel habarlaǵan. 18 tamyzda osy sa­pardy uıymdastyrǵan týrıstik kom­pa­nııaǵa tıesili tikushaq alpınıster bol­ýy yqtımal aýmaqqa eki márte kóte­ril­genimen joǵalǵan adamdardy taba almady. Onyń ústine bul aýmaqta qar kósh­kini júrgen eken.

Qazaqstan elshiliginde jo­ǵalǵan alpı­nıs­ter­ge barynsha kómek kór­setý maqsatynda jedel shtab quryldy. El­shi­lik qyzmetkerleri alpı­nıs­ter­diń jaqyndarymen jáne tıisti quzyrly organdarmen álsin-álsin sóılesip otyr. Máselen, M.О́tepbaevtyń týystary túni boıy elshilikte bolyp, izdeý jumystaryn úılestirý máselelerine qatysty. Qazir Qazaqstan, Qyrǵyzstan jáne Reseıden shaqyrylǵan kásibı alpınıster tobyn jetkizý úshin Qazaqstan tikushaqtarynyń Qyrǵyzstan aýma­ǵy­men ushýy­­na ruqsat alý boıynsha jumys­tar júrgizilýde. Izdestirý toptarynyń birine belgili al­­pınıst Maqsut Jumaev jetek­shilik jasaıdy dep josparlanyp otyr. Sonymen birge dıplomattar Thuraya spýtnıktik telefon baılanysy operatoryna joǵalǵan alpınısterden berilgen belgi aýmaǵyn anyqtaýǵa qoldaý kórsetýin suraǵan hat jiberdi.