«Azamattarǵa arnalǵan úkimet» astanalyq kólik ıeleri úshin tamyz aıynyń basynan jańa jobany iske qosty. Endi avtosalonnan jańa avtomobıl satyp alatyndar ony birden tirkeýge qoıyp, qujattaryn jasata alady.
Buryn jańa kólikti avtosalonnan rásimdegen kezde mamandandyrylǵan HQO-ǵa barý kerek edi. Endi avtosalonda memlekettik korporasııanyń bir qyzmetkeri jumys istep, esepke qoıý operasııalaryn júzege asyrady. Kóliktiń tehnıkalyq qujaty men memlekettik tirkeý nómiri daıyn bolǵan sátte ony salonǵa kýrer jetkizip beredi.
Ázirge bul qyzmet Nur-Sultan qalasyndaǵy Mercedes-Benz avtosalonynan kólik satyp alatyndar úshin qoljetimdi. Taıaý arada bul joba, sondaı-aq Almaty oblysynyń Talǵar aýdanyndaǵy AsterAuto avtosalonynda iske qosylatyn bolady.