Qostanaıǵa kórshi Reseıdiń Chelıabi oblysynan kelgen qonaqtarmen L.Tolstoı atyndaǵy oblystyq ámbebap kitaphanada «Mádenıet jarastyǵy» atty kezdesý ótti. Ol orystyń uly aqyny A.S.Pýshkınniń týǵanyna 220 jyl tolýyna arnaldy.
Bul sharaǵa eki eldiń shekaralas oblystary yntymaqtastyǵy aıasynda Qostanaı jáne Chelıabi jastarynyń kóshbasshylary men ulttyq-mádenı birlestikter jetekshileri jáne úkimettik emes uıymdar belsendileri qatysty. Chelıabi oblystyq Dostyq úıi dırektory Iýlııa Lapıdýs ótkizilip otyrǵan sharanyń basty mindeti jastar uıymdary belsendileriniń arasyndaǵy baılanysty nyǵaıtýǵa baǵyttalǵan áleýmettik bastamalarǵa qoldaý kórsetý ekenin aıtty.
«Eki shekaralas oblystardyń «Dostyq úıleri» 2013 jyldan bastap tyǵyz baılanysta jumys istep keledi. Basty taqyrybymyz, árıne dostyq, jastar arasyndaǵy yntymaqty nasıhattaý, jastardyń arasyndaǵy baılanystardy nyǵaıtý bolyp tabylady. Burynyraq eki oblys fılarmonııalaryndaǵy orkesterlerdi, shyǵarmashylyq jastardy kezdestirdik. Bul joly álemdik mura Pýshıkınniń týǵanyna 220 jyl tolýyn shekaralas jastar kezdesýiniń basty taqyrybyna aınaldyrdyq. «Vymysel» teatrynyń ártisteri kelip, Pýshkın shyǵarmalaryn oqydy. Osy arqyly shyǵarmashylyq jastar bir-birimen aralasady, tájirıbelerin úırenedi. Al biz Uly Abaıdyń 175 jyldyǵyna oraı uıymdastyrylǵan chellendjge qatysyp jatyrmyz», dedi Iýlııa Aleksandrovna.
«Bizdiń baılanysymyz jyl saıyn, aı saıyn jaqsy istermen nyǵaıyp keledi. Eki jaqtaǵy jaqsy isterdi almasamyz. Jaqynda ǵana Chelıabi oblysynda ótken «Týǵan jer» festıvaline qatysyp qaıttyq. Bizdegi sharalarǵa olar kelip qatysady. «Barmasań, kelmeseń – jat bolarsyń» degen ǵoı», deıdi Qazaqstan halqy Qostanaı oblystyq assambleıasy tóraǵasynyń orynbasary-hatshysy Bıbigúl Aqqojına.
QOSTANAI