Kenshiler astanasynda Qaraǵandy oblystyq «Rýhanı jańǵyrý» baǵdarlamasynyń óńirlik joba keńsesi men oblys ákimi apparatynyń «Qoǵamdyq kelisim» mekemesi uıymdastyrǵan «Tilder men mádenıetter dıalogy» atty forým-kezdesýge «Muhtar Áýezov» qoǵamdyq qorynyń dırektory Murat Áýezov bastaǵan delegasııa arnaıy kelip qatysty.
Sondaı-aq jıynǵa Ýkraınanyń Qazaqstandaǵy Qurmetti konsýly Erlan Dosmaǵambetov pen jańa qurylǵan «Qoǵam. Til. Mádenıet» QB prezıdenti, ǵalym Nursulý Bóketova, Qaraǵandy oblystyq «Rýhanı jańǵyrý» jobalyq keńsesiniń bas menedjeri Baqytqalı Musabekov, aqyn Serik Aqsuńqaruly, zertteýshi-sarapshy Marat Azbanbaev qatysyp, hákim Abaı jáne uly Muhtar týraly áńgimeniń kórigin qyzdyrdy.
Forýmnyń bastamashysy Nursulý Bóketova tilder men mádenıetter dıalogyna arnalǵan jıynnyń qoǵamdyq damýdyń mańyzdy kórinisi ekenine toqtaldy.
– Biz «Sosıým. Til. Mádenıet» atty qoǵamdyq qor qurdyq. Sol arqyly qoǵamdyq sanany jańǵyrtý, qundylyqtar júıesin qalyptastyrý sııaqty úlken mindetterdi oryndaýǵa óz úlesimizdi qosqymyz keledi, dedi ol.
Forýmda sóz alǵan Murat Áýezov Arqa jeriniń kóptegen oıshyldardyń otany ekenin erekshe atap ótti. Alashtyń kósemi Álimhan Ermekov, jazýshy Aqseleý Seıdimbek, aqyn Búrkit Ysqaq jaıly estelikterimen bólisti.
– Dıalog degenimizdiń ózi bir-birimizdi tyńdaı bilý ǵoı. Bul óte mańyzdy dúnıe. Abaıdyń ózi bizdi buǵan shaqyrǵan. «Rýhanı jańǵyrý» baǵdarlamasynyń eki mazmundy kezeńi bar: tarıhty taný jáne osy tarıhty meńgerý. Bizdiń barlyǵymyz tarıhtyń murageri bolý ónerine úırenýimiz kerek. Bilip qana qoımaı, halqymyzdyń tarıhynda bolǵan jaqsy dúnıelerdi ózimizdiń, otandastarymyzdyń sanasyna sińirýimiz qajet, dep atap ótti mádenıettanýshy.
Murat Áýezov osyndaı pikirtalasty uıymdastyrǵany úshin qaraǵandylyqtarǵa alǵys sezimin bildirip, óziniń «Vremen svıazýıýshaıa nıt» atty týyndysyn «Dostyq úıiniń» kitaphanasyna tartý etti.
– Saıyp kelgende eki aspekt bar. Ol bizdiń jaratylysymyzdyń tabıǵı sapasy retinde dúnıege keletin bitimgershilik. Bul jerge qýǵyn-súrginge ushyraǵan jáne kúshtep qonys aýdarylǵan halyqtar óz erkimen kelgen joq. Qazaqtar olardy aman saqtap qaldy. Ekinshi jaǵynan alyp qaraǵanda, biz ádilirek, baqyttyraq bolashaqqa ıe bolýǵa quqylymyz. Meniń oıymsha, mundaı úderiske bizdiń sanamyzdyń qanshalyqty qatysy baryn dál osyndaı jolmen aıqyndap alýymyz kerek, – dedi Murat Muhtaruly.
Jıyn barysynda tarıhshylar men abaıtanýshylar óz pikirlerin ortaǵa saldy.
Sondaı-aq forým aıasynda jergilikti aqyn-jazýshylardyń basyn biriktiretin «Arna» ádebı klýbynyń tusaýkeser rásimi ótti.
Forým qonaqtary Dolınkadaǵy saıası qýǵyn-súrgin qurbandaryn eske alý murajaıyn aralap kórip, Buqar jyraý aýdanyndaǵy Buqar Qalqamanulynyń memorıalyna baryp qaıtty.
Qaraǵandy oblysy