Qazaq Keńestik Sosıalıstik Respýblıkasy — burynǵy KSRO quramynda bolǵan odaqtas respýblıkalardyń biri. Ol 1920 jyly 26 tamyzda quryldy. Alǵashqy kezde Qyrǵyz AKSR-i dep atalyp, RKFSR quramyna kirdi. 1936 jyly 5 jeltoqsanda odaqtas respýblıkaǵa aınaldy.
KSRO-nyń Azııalyq bóliginiń ońtústik-batysynda ornalasty, soltústiginde RKFSR-men, ońtústiginde Túrikmen KSR-men, О́zbek KSR-men jáne Qyrǵyz KSR-men, shyǵysynda Qytaımen shektesti, batysynda Kaspıı teńizi. Qazaq KSR-y — jer kólemi jaǵynan RKFSR-den keıingi ekinshi, halqynyń sany jaǵynan RKFSR men Ýkraınadan keıingi úshinshi odaqtas respýblıka boldy. Jeri 2724,9 myń km². Astanasy — Almaty qalasy. Ákimshilik jaǵynan 19 oblysqa, 210 aýdanǵa bólindi, 82 qalasy boldy.
Qazaq KSR — jumysshylar men sharýalardyń sosıalısttik memleketi, KSRO quramyna kiretin odaqtas keńestik sosıaldy respýblıka. Konstıtýsııasy Qazaq KSR Keńesteriniń Tótenshe 10-sezinde 1937 j. 26 naýryzda bekitilgen. Memleket ókimettiń Joǵary organy — bir palataly Qazaq KSR Joǵarǵy Keńesi, ony halyq 27 myń turǵynnan bir depýtat esebimen 4 jylǵa saılanatyn. Joǵarǵy Keńestiń sessııalary aralyǵyndaǵy memleket ókimettiń joǵary organy — Qazaq KSR Joǵarǵy Keńesiniń Prezıdıýmy bolyp taǵaıyndalǵan. Joǵarǵy Keńes Respýblıka úkimetin — Qazaq KSR Mınıstrlik Keńesin qurdy, Qazaq KSR zańdaryn qabyldady. Oblystar men aýdandarda, qalalarda, aýyldarda eńbekshiler depýtattarynyń tıisti Keńesteri ókimettiń jergilikti organdary bolyp tabylatyn. Olardy halyq 2 jylǵa saılaıtyn. KSRO Joǵarǵy Keńesiniń Ulttar Keńesine Qazaq KSR-y 32 depýtat jibergen. Joǵary sot organy — Qazaq KSR Joǵarǵy Keńesi 5 jylǵa saılaıtyn Joǵarǵy sot. Onyń quramynda 2 sot kollegııasy (azamattyq jáne qylmystyq ister boıynsha) jáne Pleným bar. Sonymen qatar Joǵarǵy Sottyń Prezıdıýmy quraldy. Qazaq KSR prokýroryn KSRO Bas prokýrory 5 jylǵa taǵaıyndalatyn bolǵan.