Oqýshylar saraıynda oblys aktıviniń qatysýymen Memleket basshysy Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynan týyndaıtyn mindetterdi talqylaýǵa arnalǵan alqaly basqosý ótti. Onda oblys basshysy Qumar Aqsaqalov baıandama jasap, tarıhı qujattyń mańyzdylyǵyna jan-jaqty toqtaldy.
– Joldaý Elbasy usynǵan bes ınstıtýsıonaldyq reforma men Ult josparyn tolyqqandy júzege asyrýǵa baǵdarlanǵan. Onda elimizdiń qoǵamdyq-saıası ómirindegi jańǵyrtýlar, qarqyndy damyǵan ekonomıka qalyptastyrý, turǵyndardyń sapaly ómir súrý kórsetkishin, áleýmettik jaǵdaıyn nyǵaıtý, aýyldyq jerlerde jańa jumys oryndaryn ashý, shaǵyn jáne orta bıznesti damytý, taǵy basqa irgeli máseleler boıynsha Úkimet pen jergilikti bılik organdaryna naqty tapsyrmalar júkteldi. Biz osyndaı aýqymdy mindetterdi oryndaýdyń tetikterin qarastyryp, ár baǵyt boıynsha taldaý jasaýǵa jınalyp otyrmyz, deı kelip, Qumar Irgebaıuly óńirde birinshi kezekte qandaı salalarǵa basymdyq beriletinin atap ótti.
Prezıdent tapsyrmasyna sáıkes eńbek ónimdiliginiń naqty ósimin kem degende 1,7 ese ósirý talaby tur. Petropavl aýyr mashına jasaý, Kırov atyndaǵy zaýyttarda engizilgen ozyq tehnologııalar esebinen eńbek ónimdiligin 2,5 esege ósirýge múmkindik týdy. Baspa platalaryn shyǵaratyn kásiporynǵa júzden astam zamanaýı qondyrǵylar ákelindi. «RımKazAgro» JShS-inde 1,2 myń tonna ónim óndiretin fabrıka paıdalanýǵa berildi. Metallýrgııalyq kompanııalar altyn óndirisin 40 paıyzǵa ulǵaıtty. Shıkizatqa baılanǵan mentalıtetten bas tartyp, ekonomıkany ártaraptandyrý mindetteri údesinen kóriný úshin ındýstrııalyq-ınnovasııalyq damý baǵdarlamasy sheńberinde 36,9 mlrd teńgeniń 41 jobasy júzege asyrylady. 1,5 myń jańa jumys oryndary qurylady.
О́ńirde kásipkerlikti damytýdyń úlgi bolarlyq mysaldary az emes. Búginde 30 myńnan astam shaǵyn jáne orta kásipkerlik sýbektileri jumys isteıdi. Mıkro jáne shaǵyn bıznes salasyndaǵy kompanııalardy tabysqa salynatyn salyqtan úsh jylǵa bosatý úshin zańnamalyq bazaǵa túzetýler engizilip, 2020 jyldan bastap kúshine enetini, sondaı-aq tekseris júrgizýge osynsha merzimge tyıym salynatyny bul saladaǵy kedergiler men aýyrtpalyqty aıtarlyqtaı azaıtary anyq. Q.Aqsaqalov Joldaýda negizgi resýrsymyz bolyp tabylatyn aýyl sharýashylyǵynyń áleýeti tolyq paıdalanylmaı otyrǵany atap kórsetilgenine, jer máselesi erekshe sóz bolǵanyna jınalǵandardyń nazaryn aýdardy. Júrgizilgen tekseristerdiń nátıjesinde sońǵy tórt jylda 668 myń gektar jer memleket menshigine alyndy. Aýylsharýashylyq alqaptaryn jalǵa alýshylar arasynda jerdi ıgermeı, bosqa ustap otyrǵandar áli de kezdesedi. Aldaǵy ýaqytta olarǵa qatań sharalar qoldanamyz, – dedi óńir basshysy.
«Aýyl – el besigi» jobasy aıasynda 292 eldi mekenniń ınfraqurylymdary damytylady. Az qamtylǵan, turmysy tómen jandarǵa jan-jaqty qamqorlyq kórsetiledi. Búginde járdemaqy mólsheri 10 esege artyp, jyl basynan beri 21,7 myń otbasy 1,3 mlrd teńgeniń áleýmettik kómegin aldy. 799 adam men 125 otbasyna bir rettik áleýmettik járdemaqy berildi. Basqosýda qurylys ındýstrııasyn jetildirý, eńbek resýrstary tapshylyǵyn azaıtý, aýyz sý, jol jaıyn jaqsartý, medısınalyq qyzmettiń sapasyn, qoljetimdiligin arttyrý máseleleri boıynsha aýdan ákimderi men tıisti vedomstvolarǵa birqatar tapsyrmalar júktedi.
Jıynda «Aqseleý» JShS-niń basshysy Serik Malaev, «MATEX» shulyq fabrıkasynyń dırektory Aramaıs Ter-Astvasatýrıan, N.Pogodın atyndaǵy orys drama teatrynyń jetekshisi Spartak Ramazanov, Petropavl qalalyq máslıhatynyń depýtaty Pavel Afanasev, taǵy basqalary oı-pikirlerin ortaǵa saldy.
Soltústik Qazaqstan oblysy