Bıylǵy 8 aıdyń kórsetkishi boıynsha elimizde mashına jasaý óndirisiniń kólemi 18 paıyzǵa artty. Bul týraly keshe Úkimet úıinde ótken baspasóz máslıhatynda Indýstrııa jáne ınfraqurylymdyq damý vıse-mınıstri Amanııaz Erjanov aıtty.
Sońǵy jyldary mashına jasaý salasynda turaqty ósim baıqalady. Byltyrǵy qorytyndy óndiris kólemi alǵash ret 1 trln teńgelik mejeni eńserdi. Bıyl da joǵary dınamıka saqtalyp otyr.
− Qazaqstanda avtokólik quraldarynyń barlyq sanattary qurastyrylady. Jalpy 167 model qurastyrylsa, onyń ishinde 39-y jeńil kólik, 22-si álemdik brendke jatady. 10 jyldyń ishinde avtomobıl jasaý Qazaqstannyń mashına jasaý salasyndaǵy draıverlerdiń birine aınaldy, − dedi A.Erjanov. Onyń aıtýynsha, ındýstrııalandyrý baǵdarlamasyn júzege asyrý jyldarynyń ishinde mashına jasaý salasynda jalpy somasy 276 mlrd teńgeni quraıtyn 114 joba júzege asyrylyp, shamamen 11 myń jumys orny qurylǵan. Nátıjesinde lokomotıv, transformator, kommýnaldyq jabdyqtar, optıkalyq quraldar syndy jańa ónimder shyǵaryla bastady.
− Munyń barlyǵy da memlekettiń tabysty ónerkásiptik saıasaty arqyly jasalyp jatyr. Indýstrııalyq damýǵa basymdyq berý arqyly Qazaqstan ekonomıkasy damyp keledi. Avtoóndiris jáne temirjol mashına jasaý salasy belsendi damyp, aýyl sharýashylyǵy, elektrotehnıkalyq, taý-ken jáne munaı-gaz mashına jasaý salalary aıtarlyqtaı jańardy. Salany damytýǵa Alstom, General Electric, SMS – JAC Motors, Hyundai jáne basqalar sııaqty iri transulttyq korporasııalar tartyldy, − dedi.
Jıynda belgili bolǵandaı, kooperasııalyq baılanystardy damytý úshin aǵymdaǵy jyldyń sáýirinde Qazaqstan men Reseı arasynda birlesken is-qımyl baǵdarlamasy qabyldandy.
Aǵymdaǵy jyldyń sáýir aıynda «Hyundai Trans Kazakhstan» JShS-nyń «Hyundai» markaly jeńil avtokólikterin óndiretin jańa zaýytynyń irge tasy qalandy. Qytaı seriktesterimen yntymaqtastyq aıasynda shınalar men qozǵaltqysh shyǵaratyn zaýytty iske qosý josparlanyp otyr.