Jumys isteımin dep umtylyp turǵan adamǵa kásip kóp. Máselen, Balkashın aýylynyń turǵyny Iýrıı Shıshkın on jyldan beri balyq ósirýmen aınalysyp keledi.
Seksen kóldi omyraýyna altyn alqa etip taqqan Kókshetaý men Qorǵaljyn óńirinde balyq ósirýge múmkindik mol. Osy múmkindikti qalt jibermegen ákeli-balaly Shıshkınder Sandyqtaý, Zerendi, Atbasar aýdandarynyń aýmaǵyndaǵy tórt toǵandy jalǵa alǵan. Árıne tabıǵatqa zalal keltirmeý birinshi kezekte. Esesine buryn balyq túgil baqa óristemegen keıbir toǵandar qazir yrysqa shúpildep tur. Kásipkerler Chelıabi qalasyndaǵy balyq tuqymdaryn ósiretin zaýyttan 15 mıllıon móńke balyǵynyń shabaǵyn ákelip, kólge jibergen. Arqanyń keıbir kólderi tym taıyz bolyp keledi. Sondyqtan, qys boıy muzyn oıyp, ottegin jiberip kútpese jáne bolmaıdy.
– Balyq syryn jete meńgerý úshin onymen túbegeıli aınalysý kerek, – deıdi kásipker Iýrıı Shıshkın, – máselen, biz balyq tabıǵatyn, ony ósirýdiń qyr-syryn jete meńgerýge tyrysýdamyz. Kóldegi balyq kóbeıse, jalǵyz kásipker úshin emes, elge de paıdaly. Aıdabol kólinde balyqtyń 7-8 túri bar. Qysy-jazy balyq aýlaýǵa keletin balyqshylar kóp. Al biz bolsaq, súıegi az, eti tolymdy balyq túrlerin kóbeıtýge múddelimiz. Demek, tabıǵattan alǵanymyzben oǵan bere de bilemiz.
Kásipker tilge tıek etip otyrǵan Aıdabol kóline bıyl 12 mıllıonǵa jýyq shabaq jiberilgen eken. Mamandardyń boljamyna qaraǵanda, osynshama shabaqtyń 40 paıyzǵa jýyǵy qatarǵa qosylyp ketýi múmkin. Demek, kásipkerdiń joǵaryda aıtqan pikiriniń jany bar.
– Men áýesqoı balyqshymyn ári qoǵamdyq negizdegi qoryqshymyn, – deıdi Vıktorovka aýylynyń turǵyny Aleksandr Akınchın, – osy kól buryn qaraýsyz jatqan. Balyǵy bar kezde kól ústinde qustaı qaptaǵan áýesqoı balyqshylar balyq azaıǵan soń kórinbeı ketip edi. Endi mine, qaıtadan qaptady. О́ıtkeni kóldi uzaq merzimge jalǵa alǵan kásipkerler arqyly balyq óristeı bastady. Demek, ár iske ıe kerek.
Memleket tarapynan aýyl sharýashylyǵymen aınalysatyn kásipkerlerge tolymdy kómek kórsetilýde. Balyq sharýashylyǵy da eskerilse eken deısiz. О́ıtkeni bul da aq dastarqannyń berekesin arttyratyn yrystyń bir túri ǵoı. Aqmola oblysy,Sandyqtaý aýdany