Qaraǵandy oblysyndaǵy Jańaarqa aýdanynda 1 myń kúbidegi 10 myń lıtr qymyz bir mezette pisilip, bul oqıǵa Gınnestiń rekordtar kitabyna resmı túrde tirkeldi.
Uıymdastyrýshylar atalǵan sharany aýdannyń 90 jyldyǵy men aqyn-jazýshy, memleket jáne qoǵam qaıratkeri Sáken Seıfýllınnniń 125 jyldyǵyna arnalǵan toı aıasynda júzege asyrdy.
«Qaraýyl tóbe» toı alańynda ótken bul aýqymdy sharany Gınnestiń rekordtar kitabyna engizý úshin atalǵan uıymnyń ókili Iýdelkıs Dıas Jańaarqaǵa Kýbadan arnaıy keldi.
– Rekordtyq kórsetkishti tirkeý úshin biz sharaǵa qatysýshylardyń bárin sanap shyqtyq. Olardyń qymyzdy bir mezette jáne úılesimmen piskenine mańyz berdik, – deıdi Iýdelkıs Dıas.
Al Gınnestiń rekordtar kitabynyń Qazaqstandaǵy resmı ókili Baqytjan Tastúlekov mundaı nátıjeniń elimizde tuńǵysh ret tirkelip otyrǵanyn atap ótti.
– Muny júzege asyrý ońaıǵa soqpady. Sebebi qazirgi zamanda kúbi tabý ońaı emes. Al munda myń kúbi boldy. Bul rekordty bolashaqta jańartý qıyn bolady dep oılaımyn, – dedi ol.
Rekordtyq nátıje tirkelgennen keıin Jańaarqanyń dámi til úıirgen kól-kósir qymyzy toı qonaqtaryna tegin taratyldy.
Sonymen qatar bul toıda baýyrsaq jáne palaý festıvali uıymdastyrylyp, shara sońy shyǵarmashylyq ujymdar qoıǵan úlken konsertpen túıindeldi.
Qaraǵandy oblysy