El ishinde ótkenińmen maqtana bergenshe, erteńgi kúnińniń qamyn jasaǵan áldeqaıda qaıyrly bolmaq degen esti pikirdi estip qalyp júremiz. Degenmen, baǵzy zamanda babalaryńnyń kim bolǵanyn, olar qurǵan qaǵanattar pen handyqtardyń órkenıet ólkesinde qandaı oryn alǵanyn bilýge degen qushtarlyqty qalaısha tunshyqtyryp qoıýǵa bolady?!
Tarıhyńnan ilip alǵan túıirdeı ǵıbratyń bolmasa, aldaǵy kúnderimde arman ataýlynyń nebir ǵajabyn iske asyramyn dep astamshylyqqa barý tym aǵattyq bolar edi. Máselen, keshegi Qazaqstan halqyna arnaǵan Joldaýynda Memleket basshysy Qasym-Jomart Toqaev Ulys ulyq – Altyn Ordanyń 750 jyldyq mereıtoıyn laıyqty túrde atap ótý kerektigine erekshe mán berdi. Budan sál buryn el Prezıdenti Qaraǵandy oblysyna jumys saparymen kelip, «Ulytaý-2019» halyqaralyq týrıstik forýmǵa qatysqanda Altyn Ordanyń negizin qalaǵan Joshy hannyń esimin ulyqtaýdy, kesenesin mádenı týrızm nysanyna aınaldyrýdy aıryqsha tapsyrǵan edi.
Iá, dál qazirgi ýaqyt – eki bilekti sybanyp, erteńgi kúnniń qamy úshin jan aıamaı eńbek etetin kez. Alaıda taban astyndaǵy tarıhymyzdy attap ótip, joǵalǵanymyzdy izdemesek, óshkenimizdi jandyrýǵa umtylmasaq, bizdiń bolashaqqa degen kóp isimizdiń túbi baıandy bolaryna kim kepildik berer eken? Al Prezıdent bolsa, «Ata-baba amanatyna adal bolý – bizge syn», dep bul taqyryp tóńiregindegi pikirtalasqa qapysyz tóreligin aıtty.
«El – aman, jurt – tynysh» zamanymyz uzaǵynan súıindirse, memleketimizdegi shetin máseleler retimen sheshile bererine kúmán joq. Qazirdiń ózinde bul baǵyttaǵy jumystardyń jemisin kóre bastadyq. Joldaýda aıtylǵandaı, ustazdar men mádenıet salasy qyzmetkerleri eńbekaqylarynyń kóterilýi, jalpy halyqtyń ál-aýqatyn jaqsartý, ol kóksegen murattardy, ásirese ana tilimizdi ultaralyq qatynas tili dárejesine jetkizýdi iske asyrý jolyndaǵy ıgi qadamdardy ekonomıkalyq turǵyda damý dańǵylyna túsken memleketimiz nazardan tys qaldyrmaıdy degen senimdemiz.
Osy oraıda, ǵalamattyǵy talas týdyrmaıtyn tarıhymyzǵa tereń úńilip, órkenıet kóshinde tuǵyry bıik bolǵan dańqty babalarymyzdy dúnıe júzi moıyndaıtyn deńgeıde ulyqtaı alsaq, bul da memleketimizdiń álemdik qoǵamdastyq aldyndaǵy abyroı-bedeliniń asqaqtaýyna, keshegi men búgingisiniń tizginin teń ustaǵan ımıdjiniń tartymdylyǵy arta túsýine úlesin aıamaı qosatyn taǵylymdy is bolmaq.
Dýman ÁBDIRAMANOV,«Kazsınk» JShS ashyq taý-ken jumystary boıynsha bas kenshi, Qaraǵandy oblystyq máslıhatynyń depýtaty