Ishki ister organdaryn jańǵyrtý jónindegi 2019-2021 jyldarǵa arnalǵan Jol kartasyn jáne Qazaqstan Respýblıkasynyń Prezıdenti Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynda belgilengen maqsattardy iske asyrý aıasynda Jambyl oblysynda birden bes front-keńse ashyldy. Keńselerdiń ashylý saltanatyna ákimdik ókilderi, polısııa basshylyǵy men qyzmetkerleri, Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti jáne úkimettik emes uıymdardyń ókilderi qatysty.
Búgingi tańda Jambyl oblysynda barlyǵy 14 front-keńse jumys atqarady. Polısııanyń halyqpen baılanys jasaýdaǵy engizilgen jańashyldyq úrdisi qoǵamdyq dıalogty uıymdastyrýdy aıtarlyqtaı jaqsartýda. Sonymen qatar azamattardyń qajettilikterine qatysty ashyqtyq pen jedel den qoıý qaǵıdattaryn iske asyrýǵa múmkindik berýde. Munda ákimshilik polısııa, kóshi-qon jáne jergilikti polısııa qyzmetiniń mamandary turǵyndardyń suraqtaryna jaýap berip, túrli máselelerdi sheshýge qatysty qajetti kómek kórsetedi. Sonymen qatar, halyqqa kórsetiletin memlekettik qyzmetter boıynsha aqparat beredi. Sondaı-aq front-keńse qyzmetkerleri ózderiniń tikeleı mindetterin oryndaýmen qatar, quqyq qorǵaý organdarynyń jumysyn jaqsartý jónindegi azamattardyń usynys-pikirlerin de tirkeıdi. «Quqyq qorǵaý organdarynda buryn-sońdy azamattardy qabyldaıtyn mundaı front-keńselerdiń bolmaǵanyn eskersek, departament basshylyǵy oblys turǵyndary úshin bul jańashyldyqtyń tıgizer paıdasy mol bolatynyna senim artyp otyr», deıdi Jambyl oblystyq polısııa departamentiniń baspasóz hatshysy Gúlsara Muhtarqulova.
Jańa front-keńse óz jumysyn bastaǵannan keıin oblystyq polısııa departamentiniń bastyǵy, polısııa polkovnıgi Arman Orazalıev azamattardy jeke qabyldady. Budan keıin Taraz qalasynyń polısııa basqarmasy men №2 qalalyq polısııa bóliminde ashylǵan jańa front-keńselermen tanysty. Búgingi tańda front-keńse qyzmetkerlerine barlyǵy 5000-nan astam adam júgingen. Olardyń barlyǵyna der kezinde quqyqtyq kómek kórsetilip keledi jáne árbir ótinishke azamattar tolyqqandy jaýap alýda.