Taıaýda Qaraǵandy oblysy ákiminiń orynbasary Almas Aıdarov jylytý maýsymyna daıyndyq aıasynda kómir satý beketteriniń jumysyn tekserip qaıtty. Mundaǵy basty maqsat – qamsyz otyrǵan aǵaıyn qar túskende japa-tarmaǵaı júgirip, sodan uzyn-sonar kezek týyndap, aıǵaı-shý bolmasyn degeni edi.
Qaraǵandy oblysynda kómir naryǵyndaǵy dúrligýge jol bermeý úshin jergilikti bılik jaǵdaıdy kúndelikti rejimde qadaǵalap otyrǵanyn aıta ketken lázim. Satyp alýshylarǵa yńǵaıly bolýy úshin óńirde kómir jetkizý jónindegi call-ortalyq ashyldy jáne saıtta ótinimderdi alystan qabyldaý da uıymdastyryldy.
– Qazir kómir maýsymynyń qyzý kezeńi bastaldy. Biz jazdan bastap halyqty otyndy aldyn ala satyp alýǵa shaqyrdyq. Usynys jetkilikti bolýy úshin jetkizýshilermen jumys istedik. О́tken jyly bul tájirıbe sátti júzege asyryldy. Alaıda biz shilde men tamyz aılarynda ótken jylǵa qaraǵanda az kómir satyp alynǵanyn anyqtadyq. Múmkin bul jazdyń ystyq bolýymen baılanysty bolar, – dedi A.Aıdarov.
Kómir alýǵa jón-josyqsyz kezekti boldyrmaý úshin onlaın-jetkizý qyzmeti arqyly kómir satatyn synama joba týraly oblys ákiminiń orynbasary egjeı-tegjeıli aıtyp berdi. Mysaly, 7543.kz saıtynda Shubarkól kómirin satyp alýǵa onlaın-tapsyrys berýge bolady. 7543 nómirinde oblystyń barlyq turǵyndary úshin qoljetimdi call-ortalyq jumys isteıdi.
Monıtorıng málimetteri boıynsha, kómirdi jetkizý negizinen kúnbe-kún iske asyrylady, keıbir jaǵdaılarda ary ketse eki táýlikke sozylýy múmkin. Sondaı-aq satyp alýshylar óz qalaýy boıynsha naqty bir belgilengen kúnge de tapsyrys bere alady.
Onlaın-tapsyrys boıynsha kómirdiń bir tonnasy 10 100 teńge turady. Jetkizý tólemi meken-jaıǵa baılanysty 5 myń teńgeden bastalady.
– Búgingi tańda bul eń arzan baǵa. Buǵan qosa, kómirdiń sapaly bolýyna da kepildik beriledi. Jetkizý kezinde bank kartasy arqyly nemese qolma-qol aqshamen tóleýge bolady, – dedi A.Aıdarov.
Bıyl oblysta 2018 jylǵa qaraǵanda kómir 2 mln tonnaǵa artyq óndirilip, 37 mln tonnany quraýy tıis dep josparlanǵan. Jalpy ónimniń 4,5 mln tonnasy kommýnaldyq-turmystyq maqsattaǵy kómirge tıesili, al 1,3 mln tonnany Qaraǵandy oblysynyń turǵyndary tutynady.
QARAǴANDY