Qazaqstan Respýblıkasynyń Zańy №73-V

Qazaqstan Respýblıkasynyń Zańy №73-V

Senbi, 2 aqpan 2013 7:13

Jeke basty kýálandyratyn qujattar týraly

Osy Zań jeke basty kýálandyratyn qujattardyń quqyqtyq negizderin aıqyndaıdy, olardy resimdeýge qoıylatyn talaptardy belgileıdi, sondaı-aq jeke bas­ty kýálandyratyn qujattardy daıyndaý, berý, aýys­tyrý, tapsyrý, alyp qoıý jáne joıý jónindegi qyzmetti retteıdi.

 

1-taraý. JALPY EREJELER

1-bap. Osy Zańda paıdalanylatyn negizgi uǵymdar

Osy Zańda mynadaı negizgi uǵymdar paıdalanylady:

1) azamattyǵy joq adamnyń kýáligi – óziniń qandaı da bir memlekettiń azamattyǵyna tıesiligine dálelde­mesi joq jeke tulǵanyń jeke basyn kýálandyratyn qujat;

2) bosqyn kýáligi – bosqynnyń jeke basyn kýálan­dyratyn jáne mártebesin rastaıtyn qujat;

 

Senbi, 2 aqpan 2013 7:13

Jeke basty kýálandyratyn qujattar týraly

Osy Zań jeke basty kýálandyratyn qujattardyń quqyqtyq negizderin aıqyndaıdy, olardy resimdeýge qoıylatyn talaptardy belgileıdi, sondaı-aq jeke bas­ty kýálandyratyn qujattardy daıyndaý, berý, aýys­tyrý, tapsyrý, alyp qoıý jáne joıý jónindegi qyzmetti retteıdi.

 

1-taraý. JALPY EREJELER

1-bap. Osy Zańda paıdalanylatyn negizgi uǵymdar

Osy Zańda mynadaı negizgi uǵymdar paıdalanylady:

1) azamattyǵy joq adamnyń kýáligi – óziniń qandaı da bir memlekettiń azamattyǵyna tıesiligine dálelde­mesi joq jeke tulǵanyń jeke basyn kýálandyratyn qujat;

2) bosqyn kýáligi – bosqynnyń jeke basyn kýálan­dyratyn jáne mártebesin rastaıtyn qujat;

3) jeke basty kýálandyratyn qujat – jeke basty sáıkestendirý maqsatynda onyń ıesiniń jeke basyn jáne quqyqtyq mártebesin anyqtaýǵa múmkindik bere­tin, jeke tulǵanyń derbes derekteri týraly tirkelgen aqparaty bar belgilengen úlgidegi materıaldyq obekt;

4) Qazaqstan Respýblıkasy azamatynyń jeke kýáligi – azamattyń jeke basyn kýálandyratyn jáne Qazaq­stan Respýblıkasynyń azamattyǵyn rastaıtyn qujat;

5) Qazaqstan Respýblıkasy azamatynyń pasporty – Qazaqstan Respýblıkasynyń aýmaǵynda jáne odan tys jerlerde azamattyń jeke basyn kýálandyratyn jáne Qa­zaqstan Respýblıkasynyń azamattyǵyn rastaıtyn qujat;

6) Qazaqstan Respýblıkasynyń dıplomatııalyq pas­porty – ózine júktelgen qyzmettik mindetterdi oryndaý úshin Qazaqstan Respýblıkasynan shyqqan, odan tys jerlerde turǵan kezde jáne Qazaqstan Respýblıkasyna kelgen kezde Qazaqstan Respýblıkasy azama­tynyń jeke basyn kýálandyratyn qujat;

7) Qazaqstan Respýblıkasynyń qyzmettik pasporty – ózine júktelgen qyzmettik mindetterdi oryndaý úshin Qazaqstan Respýblıkasynan shyqqan jáne kelgen, odan tys jerlerde turǵan kezde Qazaqstan Respýblıkasy azamatynyń jeke basyn kýálandyratyn jáne onyń ıesiniń resmı mártebesin rastaıtyn qujat;

8) Qazaqstan Respýblıkasy teńizshisiniń jeke kýá­ligi – teńiz kemesiniń bortynda (áskerı korabldi qos­paǵanda) onyń ekıpajynyń quramynda, sondaı-aq saýda maqsatynda teńizde júzý úshin paıdalanylatyn aralas (ózen-teńiz) júzetin kemeniń bortynda jumys isteıtin qujat ıesiniń nemese praktıkadan ótý úshin kemelerge jiberiletin, oqý ornynda bilim alýshynyń jeke basyn kýálandyratyn qujat;

9) qaıtyp oralýǵa arnalǵan kýálik – ıesiniń jeke basyn kýálandyratyn jáne Qazaqstan Respýblıkasyna bir rettik kelý quqyǵyn rastaıtyn qujat;

10) týý týraly kýálik – jeke tulǵanyń jeke basyn kýá­landyratyn, onyń týý faktisiniń memlekettik tirkel­geni týraly aıǵaqtaıtyn qujat;

11) ýaqytsha jeke kýálik – jeke kýáligin joǵaltqan, ol jaramsyz bolǵan ne kýáligi bolmaǵan kezde Qa­zaq­stan Respýblıkasynyń azamattaryna beriletin qujat;

12) ýákiletti memlekettik organdar – óz quzyreti sheginde jeke basty kýálandyratyn qujattardy re­simdeýdi, berýdi, aýystyrýdy, alyp qoıýdy jáne joıýdy júzege asyratyn ishki ister organdary, ádilet organdary, syrtqy saıası qyzmet salasyndaǵy organ, kólik jáne kommýnıkasııa salasyndaǵy organ;

13) sheteldik pasport – sheteldiktiń nemese aza­mattyǵy joq adamnyń jeke basyn kýálandyratyn já­ne olardyń quqyqtyq mártebesin rastaıtyn qujat retinde Qazaqstan Respýblıkasy tanıtyn qujat;

14) sheteldiktiń Qazaqstan Respýblıkasynda turýy­na yqtııarhat – Qazaqstan Respýblıkasynyń aýmaǵyn­da sheteldiktiń jeke basyn kýálandyratyn jáne onyń Qazaqstan Respýblıkasynda turaqty turýǵa ruqsat alǵandyǵyn rastaıtyn qujat.

 

2-bap. Qazaqstan Respýblıkasynyń jeke basty kýálandyratyn qujattar týraly zańnamasy

1. Qazaqstan Respýblıkasynyń jeke basty kýálan­dyratyn qujattar týraly zańnamasy Qazaqstan Res­pýblıkasynyń Konstıtýsııasyna negizdeledi jáne osy Zań men Qazaqstan Respýblıkasynyń ózge de norma­tıvtik quqyqtyq aktilerinen turady.

2. Eger Qazaqstan Respýblıkasy ratıfıkasııalaǵan halyqaralyq shartta osy Zańda qamtylǵannan ózgeshe qaǵıdalar belgilense, onda halyqaralyq sharttyń qaǵıdalary qoldanylady.

 

3-bap. Osy Zańnyń qoldanylý aıasy

Osy Zańnyń kúshi turatyn jerine qaramastan, Qazaqstan Respýblıkasynyń barlyq azamattaryna, Qazaqstan Respýblıkasynda turaqty turatyn nemese ýaqytsha bolatyn sheteldikterge jáne azamattyǵy joq adamdarǵa qoldanylady.

 

4-bap. Jeke basty kýálandyratyn qujattar salasyndaǵy  quqyqtyq retteý qaǵıdattary

Jeke basty kýálandyratyn qujattardy resimdeýge, berýge, aýystyrýǵa, tapsyrýǵa, alyp qoıýǵa jáne joıýǵa qoıylatyn talaptar:

1) zańdylyq;

2) mindettilik;

3) adamnyń jáne azamattyń quqyqtary men bostan­dyqtaryn saqtaý;

4) barshanyń zań aldynda teńdigi;

5) shyǵý tegi, áleýmettik, laýazymdyq jáne múliktik jaǵdaıy, jynysy, násili, ulty, tili, dinge kózqarasy, senimi, turǵylyqty jeri sebepteri boıynsha nemese kez kelgen ózge de mán-jaılar boıynsha kemsitý­shilik­ke jol bermeý;

6) adamnyń jáne azamattyń quqyqtary men mindet­teriniń birligi;

7) qoljetimdilik qaǵıdattaryna negizdeledi.

 

5-bap. Qazaqstan Respýblıkasy azamattarynyń, sheteldikterdiń jáne azamattyǵy joq adamdardyń quqyqtary men mindetteri

1. Qazaqstan Respýblıkasy azamattarynyń, Qazaq­stan Respýblıkasynda turaqty turatyn sheteldik­ter­diń jáne azamattyǵy joq adamdardyń óz mártebesine sáıkes keletin jeke basty kýálandyratyn qujattar alýǵa quqyǵy bar.

2. Turatyn jerine qaramastan, Qazaqstan Respýblıkasy azamattarynyń, Qazaqstan Respýblıkasynda tu­raqty turatyn nemese ýaqytsha bolatyn sheteldikter men azamattyǵy joq adamdardyń óz mártebesine sáıkes keletin jeke basty kýálandyratyn qujatta­rynyń bolýy mindetti.

 

2-taraý. JEKE BASTY KÝÁLANDYRATYN QUJATTARDYŃ  QUQYQTYQ NEGIZDERI

6-bap. Jeke basty kýálandyratyn qujattar

1. Mynalar:

1) Qazaqstan Respýblıkasy azamatynyń pasporty;

2) Qazaqstan Respýblıkasy azamatynyń jeke kýáligi;

3) sheteldiktiń Qazaqstan Respýblıkasynda turýyna yqtııarhat;

4) azamattyǵy joq adamnyń kýáligi;

5) Qazaqstan Respýblıkasynyń dıplomatııalyq pasporty;

6) Qazaqstan Respýblıkasynyń qyzmettik pasporty;

7) bosqyn kýáligi;

8) Qazaqstan Respýblıkasy teńizshisiniń jeke kýáligi;

9) sheteldik pasport;

10) qaıtyp oralýǵa arnalǵan kýálik;

11) týý týraly kýálik jeke basty kýálandyratyn qujattar bolyp tabylady.

Qazaqstan Respýblıkasynyń Qylmystyq is júrgizý kodeksinde kózdelgen jaǵdaılarda, júrgizýshiniń kýáligi jáne áskerı bılet jeke basty kýálandyratyn qujattar bolyp tanylýy múmkin.

2. Qazaqstan Respýblıkasynyń ýákiletti memleket­tik organdary beretin jeke basty kýálandyratyn qujattar memleket menshigi bolyp tabylady.

3. Azamattyq-quqyqtyq mámileler osy baptyń 1-tar­maǵynyń 1), 2), 3), 4), 9) jáne 11) tarmaqsha­la­rynda kózdelgen jeke basty kýálandyratyn qujattar boıynsha jasalady.

 

7-bap. Jeke basty kýálandyratyn qujattarǵa

 qoıylatyn talaptar

1. Jeke basty kýálandyratyn qujattar mynadaı derekterdi:

1) tegin, atyn, ákesiniń atyn (ol bolǵan jaǵdaıda);

2) týǵan kúnin, aıyn, jylyn jáne jerin;

3) týý týraly kýálikti qospaǵanda, jynysyn;

4) qaı ultqa jatatynyn – osy Zańnyń 6-baby 1-tar­maǵynyń 1), 2), 5) jáne 6) tarmaqshalarynda kórsetil­gen jeke basty kýálandyratyn qujattarda ıesiniń qalaýy boıynsha;

5) týý týraly kýálikti qospaǵanda, azamattyǵyn;

6) týý týraly kýálikti qospaǵanda, fotosýretin;

7) qujatty bergen organnyń ataýyn;

8) týý týraly kýálikti qospaǵanda, qujattyń beril­gen kúnin, aıyn, jylyn, nómirin, qoldanylý merzimin;

9) týý týraly kýálikti qospaǵanda, qujattar ıesiniń qoıylǵan qolyn qamtıdy.

2. Osy Zańnyń 6-baby 1-tarmaǵynyń 1), 2), 3), 4), 5), 6) já­ne 11) tarmaqshalarynda kórsetilgen jeke basty kýá­lan­dyratyn qujattar jeke sáıkestendirý nómirin qamtıdy.

3. Jeke basty kýálandyratyn qujattardy ýákiletti memlekettik organ qazaq tilinde nemese ıesiniń qalaýy boıynsha orys tilinde toltyrady.

Qazaqstan Respýblıkasy azamatynyń pasporty jáne azamattyǵy joq adamnyń kýáligi qazaq tilinde nemese ıesiniń qalaýy boıynsha orys tilinde, sondaı-aq aǵylshyn tilinde toltyrylady.

Qazaqstan Respýblıkasynyń dıplomatııalyq pas­porty, Qazaqstan Respýblıkasynyń qyzmettik pasporty, Qazaqstan Respýblıkasy teńizshisiniń jeke kýáligi qazaq jáne aǵylshyn tilderinde toltyrylady.

 

8-bap. Qazaqstan Respýblıkasy azamatynyń pasporty

1. Qazaqstan Respýblıkasy azamatynyń pasporty azamattarǵa jasyna qaramastan, olardyń qalaýy boıynsha beriledi jáne Qazaqstan Respýblıkasynyń aýmaǵynda jáne odan tys jerlerde Qazaqstan Respýblıkasy azamatynyń jeke basyn kýálandyrady.

2. Qazaqstan Respýblıkasy azamatynyń pasportyna mynadaı jazbalar men belgiler:

1) shetelge turaqty turýǵa ketý týraly ruqsat berý jazbasy;

2) ata-analarymen birge shetelge shyqqan jaǵdaı­larda on alty jasqa deıingi balalar týraly foto­sýretteri japsyrylǵan jazba;

3) shet memlekettiń vızasy;

4) shekaralyq baqylaý-ótkizý pýnktiniń shekaradan ótý týraly belgisi engizilýi múmkin.

3. Qazaqstan Respýblıkasynyń ýákiletti memleket­tik organdary Qazaqstan Respýblıkasy azamatynyń pas­portyna qoıatyn belgiler mórtabandarmen resimde­ledi, olardyń nysanyn Qazaqstan Respýblıkasynyń ýáki­letti memlekettik organdary jáne Ulttyq qaýipsizdik komıteti belgileıdi. Qazaqstan Respýblıkasy azama­tynyń pasportyna osy Zańda kózdelmegen jazbalar men belgilerdi qoıýǵa jáne engizýge tyıym salynady.

4. Qazaqstan Respýblıkasy azamatynyń pasporty on jyl qoldaný merzimine beriledi.

 

9-bap. Qazaqstan Respýblıkasy azamatynyń jeke kýáligi

1. Qazaqstan Respýblıkasynyń aýmaǵynda turaqty tura­tyn onyń azamattarynyń jeke kýáliginiń bolýy mindetti.

2. Qazaqstan Respýblıkasynyń azamattaryna on alty jastan bastap jeke kýálik beriledi.

3. Shetelge turaqty turýǵa ketetin Qazaqstan Res­pýblıkasynyń azamattary jeke kýálikterin ishki ister organdaryna tapsyrady.

4. Qazaqstan Respýblıkasy azamatynyń jeke kýáligi on jyl qoldaný merzimine beriledi.

 

10-bap. Sheteldiktiń Qazaqstan Respýblıkasynda turýyna yqtııarhat

 

1. Sheteldiktiń Qazaqstan Respýblıkasynda turýyna yqtııarhat Qazaqstan Respýblıkasynyń aýmaǵynda turaqty turatyn sheteldikterge on alty jastan bastap on jyl qoldaný merzimine, biraq olar azamaty bolyp tabylatyn eldiń pasportynyń qoldanylý merziminen aspaıtyn merzimge beriledi.

2. Shetelge shyqqan kezde sheteldiktiń jeke basyn ózi azamaty bolyp tabylatyn eldiń pasporty kýálandyrady.

 

11-bap. Azamattyǵy joq adamnyń kýáligi

1. Qazaqstan Respýblıkasynyń aýmaǵynda turaqty turatyn, on alty jasqa tolǵan azamattyǵy joq adam­darǵa azamattyǵy joq adamnyń kýáligi beriledi.

2. Azamattyǵy joq adamnyń kýáligi Qazaqstan Res­pýblıkasynyń aýmaǵynda jáne odan tys jerlerde ıesiniń jeke basyn rastaý úshin bes jyl qoldaný merzimine beriledi.

3. Shetelge ata-analarsyz, qamqorshylarsyz, qor­ǵan­shylarsyz shyqqan kezde azamattyǵy joq adamnyń kýáligi on alty jasqa deıingi adamdarǵa beriledi.

 

12-bap. Qazaqstan Respýblıkasynyń dıplomatııalyq pasporty

1. Qazaqstan Respýblıkasynyń dıplomatııalyq pas­porty Qazaqstan Respýblıkasynyń Prezıdenti beki­tetin tizbege sáıkes laýazymdy adamdarǵa beriledi.

2. Syrtqy saıası qyzmetti júzege asyratyn ýákilet­ti memlekettik organ basshysynyń tizbede kórsetil­megen adamdarǵa Qazaqstan Respýblıkasy Prezıden­tiniń kelisimi boıynsha Qazaqstan Respýblıkasynyń dıplomatııalyq pasportyn berýge quqyǵy bar.

3. Qazaqstan Respýblıkasynyń dıplomatııalyq pas­porty bar adamdardyń jubaılary men on segiz jasqa deıingi balalary uzaq merzimdi sheteldik issaparlarǵa birge shyqqan jaǵdaıda, olarǵa da dıplomatııalyq pasporttar beriledi.

4. Qazaqstan Respýblıkasynyń dıplomatııalyq pasporty bes jyl qoldaný merzimine beriledi.

 

13-bap. Qazaqstan Respýblıkasynyń qyzmettik pasporty

1. Qazaqstan Respýblıkasynyń qyzmettik pasporty Qazaqstan Respýblıkasynyń Prezıdenti bekitetin tizbege sáıkes laýazymdy adamdarǵa beriledi.

2. Qazaqstan Respýblıkasynyń qyzmettik pasporttary bar adamdarmen birge uzaq merzimdi sheteldik issaparlarǵa baratyn jubaılary men on segiz jasqa deıingi balalaryna da qyzmettik pasporttar beriledi.

3. Qazaqstan Respýblıkasynyń qyzmettik pasporty bes jyl qoldaný merzimine beriledi.

 

14-bap. Bosqyn kýáligi

1. Bosqyn kýáligi «Bosqyndar týraly» Qazaqstan Respýblıkasynyń Zańynda belgilengen tártippen bos­qyn mártebesi berilgen sheteldikter men azamattyǵy joq adamdarǵa beriledi.

2. Bosqyn kýáligi bir jyl qoldaný merzimine beri­ledi, ony ýákiletti memlekettik organ bosqynnyń shyq­qan elinde oǵan bosqyn mártebesin berýge negiz bolǵan mán-jaılar saqtalǵan kezeńge deıin árbir kelesi jylǵa uzartady.

 

15-bap. Qazaqstan Respýblıkasy teńizshisiniń jeke kýáligi

1. Qazaqstan Respýblıkasy teńizshisiniń jeke kýáligi keme bortynda jumys isteıtin Qazaqstan Respýblı­kasynyń azamattaryna nemese praktıkadan ótý úshin kemelerge jiberiletin oqý oryndarynda bilim alýshy­larǵa beriledi.

2. Qazaqstan Respýblıkasy teńizshisiniń jeke kýáligi Qazaqstan Respýblıkasynda tirkelgen kemelerde ju­mys isteý úshin jaldanǵan, Qazaqstan Respýblıkasynda turaqty turatyn sheteldikter men azamattyǵy joq adamdarǵa da beriledi.

3. Qazaqstan Respýblıkasy teńizshisiniń jeke kýáligi bes jyl qoldaný merzimine beriledi.

 

16-bap. Sheteldik pasport

1. Sheteldik pasport sheteldiktiń nemese azamat­tyǵy joq adamnyń jeke basyn kýálandyrady jáne olardyń quqyqtyq mártebesin rastaıdy.

2. Sheteldik pasportty berý negizderi jáne onyń qoldanylý merzimi shet memlekettiń zańnamasynda aıqyndalady.

 

17-bap. Qaıtyp oralýǵa arnalǵan kýálik

1. Qaıtyp oralýǵa arnalǵan kýálik:

1) Qazaqstan Respýblıkasynyń azamattaryna – olar Qazaqstan Respýblıkasynan tys jerlerde bolǵan ýa­qytta Qazaqstan Respýblıkasy azamatynyń pasportyn, Qazaqstan Respýblıkasynyń qyzmettik nemese dıplomatııalyq pasportyn joǵaltqan ne olardyń qoldanylý merzimi ótken jaǵdaıda;

2) Qazaqstan Respýblıkasynyń kámeletke tolmaǵan azamattaryna – olar Qazaqstan Respýblıkasynan tys jerlerde týǵan jaǵdaıda;

3) Qazaqstan Respýblıkasynda turaqty turatyn azamattyǵy joq adamdarǵa – olar Qazaqstan Respýblıkasynan tys jerlerde bolǵan ýaqytta azamattyǵy joq adamnyń kýáligin joǵaltqan jaǵdaıda;

4) bosqyndarǵa – olar Qazaqstan Respýblıkasynan tys jerlerde bolǵan ýaqytta jol júrý qujatyn joǵaltqan jaǵdaıda;

5) Qazaqstan Respýblıkasynyń azamattaryna jáne Qazaqstan Respýblıkasynda turaqty turatyn, Qazaq­stan Respýblıkasyna kelý úshin jaramsyz qujattary bar azamattyǵy joq adamdarǵa – olar Qazaqstan Respýblıkasyna shyǵaryp jiberilgen, Qazaqstan Respýblıkasyna berilgen jaǵdaıda beriledi.

2. Qaıtyp oralýǵa arnalǵan kýálik Qazaqstan Respýblıkasyna bir rettik kelý úshin beriledi jáne ol Qazaq­stan Respýblıkasynan ketý úshin paıdalanylmaıdy.

3. Qaıtyp oralýǵa arnalǵan kýálikti Qazaqstan Respýblıkasynyń sheteldegi mekemeleri beredi.

4. Qaıtyp oralýǵa arnalǵan kýálikke:

1) shet memlekettiń vızalar berýge ýákiletti quzy­retti organy – vızalar týraly;

2) shekara qyzmeti organy, shet memlekettiń shekaralyq baqylaýdy júzege asyratyn quzyretti organy – Qazaqstan Respýblıkasynyń Memlekettik shekarasynan jáne basqa memleketterdiń memlekettik shekaralarynan ótý týraly;

3) tıisti belgini engizgen organ – buryn engizilgen belgilerdi joıý týraly belgiler engizedi.

 

18-bap. Týý týraly kýálik

1. Týý týraly kýálik Qazaqstan Respýblıkasynyń zańnamasyna sáıkes balanyń týýyn memlekettik tirkeý týraly akt jazbasynyń negizinde beriledi.

2. Mynadaı qujattardyń birin – Qazaqstan Respýblıkasy azamatynyń jeke kýáligin, Qazaqstan Respýblıkasy azamatynyń pasportyn, azamattyǵy joq adamnyń kýáligin ne sheteldik pasportty alǵanǵa deıin týý týraly kýálik jeke tulǵanyń jeke basyn kýálan­dyratyn qujat bolyp tabylady.

 

19-bap. Jeke basty kýálandyratyn qujattardy berý negizderi

Jeke basty kýálandyratyn qujattardy berý mynadaı qujattardyń biriniń negizinde júzege asyrylady:

1) týý týraly akt jazbasy;

2) týý týraly kýálik;

3) Qazaqstan Respýblıkasy azamatynyń pasporty;

4) Qazaqstan Respýblıkasy azamatynyń jeke kýáligi;

5) ýaqytsha jeke kýálik;

6) qaıtyp oralýǵa arnalǵan kýálik;

7) azamattyǵy joq adamnyń kýáligi;

8) sheteldik pasport;

9) Qazaqstan Respýblıkasy Prezıdentiniń Jarlyǵy boıynsha Qazaqstan Respýblıkasynyń azamattyǵyna qa­byldaý, Qazaqstan Respýblıkasynyń azamattyǵynan shyǵý jáne azamattyqty ózgertý týraly, sondaı-aq Qazaqstan Respýblıkasy ratıfıkasııalaǵan halyq­aralyq sharttarǵa sáıkes azamattyqty ózgertý týraly anyqtamalar;

10) ýákiletti memlekettik organ oń turǵyda qaraǵan, bosqyn mártebesin berý týraly qoldaýhat.

 

20-bap. Jeke basty kýálandyratyn qujattardy berý

1. Jeke basty kýálandyratyn qujattardy (Qazaq­stan Respýblıkasynyń sheteldegi mekemelerinde re­sim­delgen qujattardy qospaǵanda) alýǵa ótinim beril­gen kúnnen bastap kúntizbelik otyz kúnnen keshik­tirilmeıtin merzimde ýákiletti memlekettik organdar jeke basty kýálandyratyn qujattardy ıesine nemese onyń zańdy ókiline beredi.

2. Osy Zańnyń 6-baby 1-tarmaǵynyń 1) – 4) tarmaq­shalarynda kózdelgen jeke basty kýálandyratyn qu­jat­tar jeke tulǵanyń qalaýy boıynsha Qazaqstan Res­pýb­lıkasynyń Úkimeti belgilegen tártippen jedel­detilgen túrde beriledi.

3. Jeke basty kýálandyratyn qujattardy toltyr­ǵan kezde tegi, aty, ákesiniń aty (ol bolǵan jaǵdaıda) jáne basqa derekter, Qazaqstan Respýblıkasynyń zań­da­rynda jáne Qazaqstan Respýblıkasy Prezıdentiniń aktilerinde kózdelgen jaǵdaılardy qospaǵanda, olardy berý úshin negiz bolǵan qujatqa sáıkes jazylady.

4. Jeke kýáligin joǵaltqan, ol jaramsyz bolǵan kezde ne kýáligi bolmaǵan kezde, jańasyn alǵanǵa deıin Qazaqstan Respýblıkasynyń azamattaryna úsh aı qol­daný merzimine ýaqytsha jeke kýálik beriledi.

Ýaqytsha jeke kýáliktiń qoldanylý merzimin uzar­týǵa jol berilmeıdi.

 

21-bap. Jeke basty kýálandyratyn qujattar joǵalǵan  jaǵdaıda olardy qalpyna keltirý

1. Qazaqstan Respýblıkasynyń azamattary, Qazaq­stan Respýblıkasynda turaqty turatyn sheteldikter jáne azamattyǵy joq adamdar jeke basty kýálan­dyra­tyn qujattardy joǵaltqan jaǵdaıda, jańa qujattar alý úshin ýákiletti memlekettik organdarǵa ótinish bildiredi.

2. Sheteldegi Qazaqstan Respýblıkasynyń azamattary Qazaqstan Respýblıkasynyń pasportyn joǵaltqan kezde Qazaqstan Respýblıkasynyń sheteldegi mekeme­lerine ótinish bildiredi.

 

22-bap. Jeke basty kýálandyratyn qujattardyń

 jaramsyzdyǵy, olardy aýystyrý jáne tapsyrý

1. Jeke basty kýálandyratyn qujat:

1) onda osy Zańnyń 7-baby 1-tarmaǵynyń 1), 2), 5), 6), 7) jáne 8) tarmaqshalarynda kórsetilgen derekter (týý týraly kýálikti qospaǵanda) bolmaǵan;

2) onyń qoldanylý merzimi ótken;

3) osy Zańnyń 7-baby 1-tarmaǵynyń 1), 2), 5), 6), 7) jáne 8) tarmaqshalarynda kórsetilgen derekterdi ne qu­jat­ty qorǵaý dárejesin sáıkestendirý múmkin bolmaǵan;

4) qujat joǵalǵanda, ıesi ýákiletti memlekettik organǵa ótinish bergen kúnnen bastap;

5) ıesiniń quqyqtyq mártebesine sáıkes kelmegen;

6) jynysyn ózgertken jaǵdaılarda, jaramsyz bolyp tabylady jáne tapsyrýǵa jáne aýystyrýǵa jatady.

2. Tabylǵan jeke basty kýálandyratyn qujattar ishki ister organdaryna tapsyrylady. Joǵalǵan jeke basty kýálandyratyn qujatty ıesi qalpyna keltirgen jaǵdaıda, tabylǵan qujat Qazaqstan Respýblıka­sy­nyń zańnamasynda belgilengen tártippen joıylady.

3. Qaıtys bolǵan adamdardyń, sondaı-aq sot qaıtys boldy dep jarııalaǵandardyń jeke basyn kýálan­dyratyn qujattar ýákiletti memlekettik organdarǵa tapsyrylady jáne Qazaqstan Respýblıkasynyń zań­na­ma­synda belgilengen tártippen joıylady.

 

23-bap. Jeke basty kýálandyratyn qujattardy alyp qoıý  jáne paıdalaný

1. Qazaqstan Respýblıkasynyń zańdarynda belgi­lengen jaǵdaılarda jáne tártippen aldyn ala tergeý, anyqtaý organdarynyń laýazymdy adamdary, sondaı-aq ákimshilik is júrgizý jáne azamattyqty joǵaltýdy resimdeý barysynda laýazymdy adamdar jeke basty kýálandyratyn qujattardy alyp qoıady.

О́zge organdar men laýazymdy adamdardyń jeke bas­ty kýálandyratyn qujattardy alyp qoıýyna tyıym salynady.

2. Jeke basty kýálandyratyn qujattardy kepilge qabyldaýǵa tyıym salynady.

3. Qazaqstan Respýblıkasynyń zańnamasynda kóz­del­gen jaǵdaılardy qospaǵanda, jeke basty kýálan­dyratyn qujattardyń kóshirmeleri boıynsha jeke tulǵany sáıkestendirýge, sol sııaqty olardy paıda­lanýǵa tyıym salynady.

4. Bas bostandyǵynan aıyrýǵa sottalǵan adamdar­dyń jeke basty kýálandyratyn qujattary alyp qoıylady jáne úkimderdi oryndaıtyn mekemelerde saqtalady. Jazany óteýden bosatylǵan kezde jeke bas­ty kýálandyratyn qujattar ıelerine qaıtarylady.

 3-taraý. JEKE BASTY KÝÁLANDYRATYN QUJATTAR  SALASYNDAǴY MEMLEKETTIK ORGANDARDYŃ QUZYRETI

24-bap. Qazaqstan Respýblıkasy Prezıdentiniń quzyreti

Qazaqstan Respýblıkasynyń Prezıdenti:

1) Qazaqstan Respýblıkasynyń dıplomatııalyq jáne qyzmettik pasporttaryn resimdeý, berý, aýystyrý, tapsyrý, alyp qoıý jáne joıý tártibin bekitedi;

2) Qazaqstan Respýblıkasynyń dıplomatııalyq jáne qyzmettik pasporttary beriletin Qazaqstan Res­pýblıkasy laýazymdy adamdarynyń tizbesin bekitedi;

3) Qazaqstan Respýblıkasynyń Konstıtýsııasyna jáne zańdaryna sáıkes ózge de ókilettikterdi júzege asyrady.

 

25-bap. Qazaqstan Respýblıkasy Úkimetiniń quzyreti

Qazaqstan Respýblıkasynyń Úkimeti:

1) Qazaqstan Respýblıkasynyń dıplomatııalyq já­ne qyzmettik pasporttaryn qospaǵanda, jeke basty kýálandyratyn qujattardy resimdeý, berý, aýystyrý, tapsyrý, alyp qoıý jáne joıý tártibin bekitedi;

2) jeke basty kýálandyratyn qujattardyń úlgile­rin jáne olardy qorǵaýǵa qoıylatyn talaptardy bekitedi;

3) Qazaqstan Respýblıkasynyń Konstıtýsııasynda, zańdarynda jáne Qazaqstan Respýblıkasy Prezıden­tiniń aktilerinde kózdelgen ózge de ókilettikterdi júzege asyrady.

 

26-bap. Ishki ister organdarynyń quzyreti

Ishki ister organdary:

1) jeke basty kýálandyratyn qujattardyń:

Qazaqstan Respýblıkasy azamaty pasportynyń;

Qazaqstan Respýblıkasy azamaty jeke kýáliginiń;

sheteldiktiń Qazaqstan Respýblıkasynda turýyna yqtııarhattyń;

azamattyǵy joq adamnyń kýáliginiń;

bosqyn kýáliginiń úlgilerin, olardy resimdeý, berý, aýystyrý, tapsyrý, alyp qoıý jáne joıý tártibin ázirleıdi;

2) osy baptyń 1) tarmaqshasynda kórsetilgen jeke basty kýálandyratyn qujattardy resimdeýdi, berýdi, aýystyrýdy, alyp qoıýdy jáne joıýdy júzege asyrady;

3) Qazaqstan Respýblıkasynyń zańdarynda, Qazaq­stan Respýblıkasy Prezıdentiniń jáne Qazaqstan Respýblıkasy Úkimetiniń aktilerinde kózdelgen ózge de ókilettikterdi júzege asyrady.

 

27-bap. Syrtqy saıası qyzmet salasyndaǵy ýákiletti  memlekettik organnyń quzyreti

Syrtqy saıası qyzmet salasyndaǵy ýákiletti memlekettik organ:

1) Qazaqstan Respýblıkasy dıplomatııalyq paspor­tynyń jáne Qazaqstan Respýblıkasy qyzmettik pas­por­tynyń úlgilerin, olardy resimdeý, berý, aýys­tyrý, tapsyrý, alyp qoıý jáne joıý tártibin ázirleıdi;

2) qaıtyp oralýǵa arnalǵan kýáliktiń úlgisin, ony resimdeý, berý jáne aýystyrý tártibin ázirleıdi;

3) osy baptyń 1) tarmaqshasynda kórsetilgen jeke basty kýálandyratyn qujattardy resimdeýdi, berýdi, aýystyrýdy, alyp qoıýdy jáne joıýdy júzege asyrady;

4) shetelde turaqty turý quqyǵyna qujattar alǵan Qazaqstan Respýblıkasy azamattarynan jeke kýáligin jáne ózge memlekettiń azamattyǵyn qabyldaǵan jaǵdaıda – pasportyn Qazaqstan Respýblıkasynyń zańnamasynda belgilengen tártippen alyp qoıady;

5) Qazaqstan Respýblıkasynyń zańdarynda, Qazaq­stan Respýblıkasy Prezıdentiniń jáne Qazaqstan Res­pýblıkasy Úkimetiniń aktilerinde kózdelgen ózge de ókilettikterdi júzege asyrady.

 

28-bap. О́zge de ýákiletti memlekettik organdardyń quzyreti

О́zge de ýákiletti memlekettik organdar:

1) jeke basty kýálandyratyn qujattardyń:

ádilet organdary – týý týraly kýáliktiń;

kólik jáne kommýnıkasııa salasyndaǵy ýákiletti memlekettik organ – Qazaqstan Respýblıkasy teńiz­shisi­niń jeke kýáliginiń úlgilerin, olardy resimdeý, berý, aýystyrý, tapsyrý, alyp qoıý jáne joıý tártibin ázirleıdi;

2) óz quzyreti sheginde jeke basty kýálandyratyn qujattardy resimdeýdi, berýdi, aýystyrýdy, alyp qoıýdy jáne joıýdy júzege asyrady;

3) Qazaqstan Respýblıkasynyń zańdarynda, Qazaq­stan Respýblıkasy Prezıdentiniń jáne Qazaqstan Res­pýblıkasy Úkimetiniń aktilerinde kózdelgen ózge de ókilettikterdi júzege asyrady.

 

4-taraý. QORYTYNDY EREJELER

29-bap. Jeke basty kýálandyratyn qujattardy daıyndaý  salasyndaǵy memlekettik monopolııa

Osy Zańnyń 6-baby 1-tarmaǵynyń 1), 2), 3) jáne 4) tarmaqshalarynda kórsetilgen jeke basty kýálandy­ratyn qujattardy daıyndaý, qujattardy daıyndaý júıesi de­rekteriniń yqpaldastyrylǵan bankin jınaqtaý jáne júrgizý, kóshi-qon úderisteriniń esebin júrgizý jumysyn avtomattandyrý, ishki ister organdary úshin baǵdar­­lama­lyq-tehnıkalyq ónimderdi ázirleý, engizý jáne súıemeldeý jónindegi qyzmet memlekettik monopolııaǵa jatady jáne ony Qazaqstan Respýblıkasy Úkimetiniń sheshimi boıynsha qurylǵan sharýa­shylyq júrgizý quqyǵyndaǵy respýb­­lıkalyq meml­e­kettik kásiporyn júzege asyrady.

 

30-bap. Qazaqstan Respýblıkasynyń jeke basty kýálandyratyn  qujattar týraly zańnamasyn buzǵany úshin jaýaptylyq

 

Qazaqstan Respýblıkasynyń jeke basty kýálan­dyratyn qujattar týraly zańnamasyn buzý Qazaqstan Respýblıkasynyń zańdaryna sáıkes jaýaptylyqqa ákep soǵady.

 

31-bap. Osy Zańdy qoldanysqa engizý tártibi

Osy Zań alǵashqy resmı jarııalanǵanynan keıin kúntizbelik on kún ótken soń qoldanysqa engiziledi.

Qazaqstan Respýblıkasynyń Prezıdenti

N.NAZARBAEV.

Astana, Aqorda, 2013 jylǵy 29 qańtar  №73-V QRZ