Shymkentte jemis pen kókónisti qaıta óńdeý jáne konservileý zaýyty ashyldy. «Dary Saırama» JShS-niń jobalyq quny – 350 mln teńge, sondaı-aq memleket bıýdjetinen 70 mln teńge sýbsıdııa berilgen. Munda turaqty 120 adam jumyspen qamtylsa, maýsym kezinde 400-ge jýyq jumys orny ashylady. Sonymen qatar seriktestik janynda 5 gektar qarqyndy júzim plantasııasy men 1 gektar jylyjaı kesheni bar. Zaýytta shyryn quıý jelisi, tosap óndirý, lecho, tomat pastasy, konservilengen qııar, qyzanaq, túrli salattar syndy basqa da ónimder shyǵarylady.
Jylyna 10 mıllıon qalbyr konservilengen ónim shyǵaratyn zaýyttyń jumysymen qala ákimi Erlan Aıtahanov arnaıy tanysty. Otandyq ónimderge suranysty arttyrý úshin taýar sapasyna kóńil bólý kerektigin aıtqan shahar basshysy qazirgi ekonomıkalyq jaǵdaıda naryqta básekege qabilettilik óte mańyzdy ekenine toqtaldy.
«Qala turǵyndary men qonaqtaryn jergilikti azyq-túlik taýarlarymen qamtamasyz etý maqsatynda azyq-túlik beldeýi aımaǵynda qajetti óndiristi qurý, elimizdiń ózge óńirlerine ónimderimizdi turaqty túrde jetkizýge jaǵdaı jasaý, azyq-túlik baǵasyn bir júıege keltirý, jylyjaı máseleleri men Shymkenttiń saýda ınfraqurylymyn damytý bizdiń negizgi mindetterimizdiń biri», dedi Erlan Qýanyshuly. Sondaı-aq qala ákimi kúnine 3 tonna sút óndiretin «Zertas» sharýa qojalyǵyn aralap kórdi. Munda 128 bas asyl tuqymdy sútti-etti baǵyttaǵy iri qaradan quralǵan mal sharýashylyǵy qurylǵan. Taýarly sút fermasynda 15 adam turaqty jumyspen qamtylǵan.
Sút óndirýdi arttyrý baǵyty boıynsha atqarylyp jatqan jumystardyń barysymen tanystyrǵan salalyq basqarma basshysy A.Qanybekov qalada «Báıterek» sharýa qojalyǵy taýarly sút fermasynyń qýaty 100 bastan 400 basqa ulǵaıtylǵanyn jáne osy syndy birqatar jobalardyń júzege asyp jatqanyn atap ótti. Budan bólek, shaharda 15 shaǵyn otbasylyq sút fermasy qurylǵan.
Aýylsharýashylyq baǵytyndaǵy nysandardy aralaý barysynda qala basshysy «Ilıaev» seriktestiginiń jylyjaı keshenimen tanysty. 2018 jyly jumysyn bastaǵan keshenniń kólemi – 2,2 gektar. Jylyjaı zamanaýı qurylǵylarmen qamtylǵan. Al seriktestik qojaıyndary elimizde bul salamen aınalysqan alǵashqy kásipkerlerdiń biri sanalady.
Sharýa qojalyqtyń ıelerimen sóılesý barysynda Erlan Aıtahanov aýylsharýashylyq salasyn damytý boıynsha memleket tarapynan tıisti kómek kórsetiletinin aıtyp, sharýalardyń usynystaryn tyńdady. Aıta keterligi, bıyl Shymkent qalasy ónerkásiptik jylyjaı jobalaryn iske asyrýda respýblıkada kósh bastap keledi.
ShYMKENT